Монгол улсын тав дахь Ерөнхийлөгчөө сонгох хариуцлагатай цаг мөч ойртсоор. Олон нийтийн уур амьсгал энэ сэдэв рүү нэлээн хандаж буй бололтой. Их хуралд суудалтай намууд ч өөрсдийн нэр дэвшигчдээ тодруулаад дууслаа. Ингээд МАН-ын М.Энхболд, АН-ын Х.Баттулга, МАХН-ын С.Ганбаатар гэсэн гурван эрхмийн дунд ерөнхийлөгчийн сонгуулийн хурц өрсөлдөөн өрнөхөөр болов.

Эдгээр гурван нэр дэвшигчийг “хэн нь хэн бэ” гэдгийг бид зохих хэмжээгээр мэднэ. Бүгд л УИХ-ын гишүүн болон бусад хариуцлагатай алба хашиж үзсэн, тэр хэрээр олны танил болж, сайн муугаар хэлүүлж байсан. Гэхдээ бүгд л тус тусдаа хувь хүн учраас өөр өөрийн гэсэн онцлогтой байж таарна.

М.Энхболдын хувьд, нөгөө хоёроо бодвол илүү том албан тушаалд ажиллаж байсан туршлагатай, Нийслэлийг олон жил удирдсан, энэ хэрээр газрын наймаатай холбоотой асуудалд нэр нь байнга дурдагддаг, Төрийн гурван өндөрлөгийн Ерөнхийлөгчөөс бусдыг хийж үзсэн гээд улстөрийн арвин намтартай нэгэн. Улаанбаатарын төвөөр багшралдан шавалдаж, бараг л бөгс эргэх зайгүй шахуу баригдсан “бетонон ширэнгэтэй” мань эрийг холбон буруутгах нь элбэг.

Харин Х.Баттулга бол улстөрийн гэхээсээ илүүтэйгээр бизнесийн арвин түүхтэй хүн. Тэрээр ганзагын наймаанаас эхлүүлсэн бизнесээ өргөжүүлсээр Монголын толгой баячуудын тоонд ортлоо томорч чадсан нэгэн. Алдартай тамирчин байсан болохоор спортод их элэгтэй. Жүдогийн Холбооны ерөнхийлөгчөөр ажиллах хугацаандаа уг төрлийн спортоор Олимп, Дэлхий, Тивийн хэмжээнд болж буй уралдаан тэмцээнүүдэд тамирчдаа асар амжилттай оролцуулж байгаа. Энэ ч утгаараа, тамирчид нь түүний төлөө гал, ус руу орохоос ч буцахгүй гэхэд хилсдэхгүй.  Баянгол дээр болсон дуулиан шуугианы үеэр яаж байсныг сайн санаж байгаа байх. Бас Шинэ Төмөрзамын бүтээн байгуулалттай холбоотойгоор нэр хүнд нь зохих хэмжээгээр унаад байгаа гэж болохоор.

С.Ганбаатарыг тэмцэгч гэдгээр нь хүмүүс хардаг. Гудамжны жагсаал цуглаанд идэвхтэй манлайлагч байсан тэрээр нэг хэсэг Үйлдвэрчний Эвлэлийн дарга, УИХ-ын гишүүн болж, олон түмний дундах дэмжлэгээс үүдэлтэй “Босоо” хэмээх цол гуншинг хүртэл авч чадсан нэгэн. Янз бүрийн байгууллагаас зохион явуулдаг санал асуулгаар хангалттай өндөр рейтингтэй гардаг, өөрөөр хэлбэл, орон нутгийн иргэдэд нэлээн таалагддаг. Харин өнгөрөх сонгуулиар жаахан тааруу гарчихсан. Бодвол, нөгөө гадаадад сургууль төгссөн хэмээн дэгс ярьчихсан зүйл нь түүнд гай болсон байх. Оюутолгойн асуудлаар нэг хэсэг хүчтэй улстөржин, С.Баярцогттой халз мэтгэлцээн хүртэл хийж, 200 хувьсагчтай томьёонд нь нам даруулсан түүхтэй.

Ийм гурван эрхмээс бид улс орныхоо “эцгийг” сонгохоор болж байна. Хэн нь “ААВ”-ын дүрд илүү зохиж чадахыг тэнгэрлэг заяат монголчууд маань шийдэх цаг хаяанд иржээ. Энд БОЛОВСРОЛЫН  тухай их яригдаж байгаа. Хэрэв ганцхан Боловсролоор бүх асуудлыг шийдчихдэг байсан бол хичнээн амар байхсан. Харамсалтай нь, үгүй юм. Тэгээд ч анхнаасаа эдгээр намууд нэр дэвшигчээ Боловсролыг нь харгалзан дэвшүүлсэн гэхэд эргэлзээтэй. Иймд Боловсролтойг бус Мөнгөтэйг нэр дэвшүүллээ гэх хардлага олны дунд гараад байгаа. Нэгэнт нэр дэвшүүлэхдээ Боловсрол харгалзаагүй байж, харин одоо Боловсрол гэж ярих нь хэтэрхий марзан бус уу. Тэгээд ч, Боловсролтой “хөлдүүгээс”, боловсролгүй ч Сэтгэлтэй нэгэн илүү дээр гэдгийг амьдрал бэлхнээ харуулаад байгаа. Ер нь ч, БОЛОВСРОЛ гэдэг их харьцангуй ойлголт. Боловсролтой хүн гэж хэнийг хэлэх вэ гэхэд л, өчнөөн янзын хариулт сонсогдох жишээний.

Иймд бидэнд мундаг олон дипломтой хүн бус, харин ЗӨВ СЭТГЭЛТЭЙ, ЭЛДЭВ ШУНАЛГҮЙ хүн л хэрэгтэй бус уу...

Д.Мигаа

Эх сурвалж: ZONE.MN