2013 оны 10 сарын 8
Хагалгаа хийж “тоглосон” согтуу эмчээс болж 20 настай бүсгүйн умайн мах тасарч унажээ

Сүүлийн үед эрүүл мэндийн салбарт нүүрлээд байгаа эмч нарын ёс зүй, авлига хээл хахууль, ажлын хариуцлага алдсан байдал хэрээс хэтэрлээ. Цагаан нөмрөгтэй “алуурчид” бүр цагаандаа гарч ажлынхаа талбар дээр сархад хүртэн үхэл амьдралын зааг дээр байгаа хөөрхий өвчтөнүүдээрээ тохуурхаж, тоглоом хийн суудаг болж. Шөнийн ээлжийн сувилагчид нь үүрэгт ажлаа умартаад зүүд нойроо харамлаж хэвтэхдээ гуравхан настай балчир охины амь насыг юман чинээ тоосонгүй. Есөн сар хэвлийдээ тээж, ангир уургаа амлуулахаар алдрайхан үрээ тэсэн ядан хүлээж суусан эхийг нойрсуулах эмээр унтуулчихаад нөхөрт нь гашуун дарс захиж суусан эмч нар хорвоод мэндлэх хувьтай ч, хоёр хөл дээрээ босох тавилангүй хоцорсон нялх хүүхдийн ирээдүйг даанч хайхарсангүй. Энэ мэт сонсоход ч итгэмээргүй, бас халаглаж харуусмаар эмгэнэлтэй явдал эрүүл мэндийн салбарт шил шилээ даран гарсаар л байна. Хэдхэн сарын өмнө Баян-Өлгий аймагт согтуу эмчийн балгаар дөнгөж төрсөн нярайн духны арьс авах юмгүй язарч, тархины гэмтэлтэй болсон хэрэг гарч байлаа. Тэгвэл саяхны өдөр бас л нэг согтуу эмч “хагалгаа” хийж тоглосон хачирхалтай, басхүү дотор жихүүцмээр хэрэг Булган аймагт гарчээ. Ингээд болсон явдлыг уншигч танд үнэнээр нь дэлгэе.

Өнгөрсөн долоо хоногийн баасан гаригт Булган аймгийн Тэшиг сумын иргэн 20 настай Б-ын хэвлийгээр базалж өвдөн сумынхаа эмнэлэгт ханджээ. Гэтэл сумын эмч нар нь чухам ямар эмчилгээ хийхээ мэдэхгүй “Өндгөвчний үрэвсэл, энэ тэр” хэмээн санал зөрөлдсөн бөгөөд энэ үед их эмч н.Дашзэвэг “Хотын эмч нар хөдөө орон нутгийг тойрч үзлэг хийж яваа. Тэднийг ирэхээр үзүүлье” гэсэн шийдвэр гаргажээ. Хөдөөгийнхөн болсон хойно, хотын эмч нар гэхээр л хамгийн мундаг нь байгаа гэсэн ойлголтоор хандаж хамаг байдгаа бариад гүйж. Харин өнөөдүүл нь үзлэгээ арван мянган төгрөгөөр үнэлсэн төдийгүй архи үнэртүүлчихсэн ажлаа хийж явсан гэнэ. Тэдэнтэй хамт ирсэн н.Баттулга гэх эмч мөнөөх 20 настай Б-г үзээд “Умайн хүзүүний баруун хэсэгт спиральны үлдэц төмөр байна. Түүнийг яаралтай авах хэрэгтэй, маргааш жижиг хэмжээний хагалгаа хийж авна” гэсэн байна. Ингээд даваа гаригийн өглөө өвчтөнөө дахин үзэхдээ согтуу байсан бөгөөд “Өө, өнөөх үлдэц чинь савны амсар дээр гараад ирж” хэмээгээд мэс ажилбараа хийсэн аж. Харамсалтай нь, цаг гаруй хугацаанд үргэлжилсэн энэ хагалгааны үеэр бүсгүйн хамаг тэвчээр барагдаж, цус нөжтэйгөө холилдож хэвтсэн бөгөөд н.Баттулга эмч “Нөгөө төмөр чинь алга болчихсон байна” гэж хэлээд хээвнэг хаяад явчихжээ. Түүгээр ч барахгүй, өөр  нэг өрөөнд ороод архи тамшаалан таг чиг болсон гэнэ. Энэ хэцүү байдлыг тэсч ядсан бүсгүйн ээж Б нь мэс засал хийж “тоглосон” эмчийг согтуу байгааг анзаарч нэр ус болон  ажлын газрынх нь хаяг зэргийг асууж, утасны дугаар гэх мэт зарим мэдээллийг авах гэтэл шуудхан татгалзаж. Тэр ч байтугай, бүр мань эр “Хүнгүй газар очъё” хэмээн санал болгосон байх юм.  

Энэ талаар өвчтөн Б-гийн ээжтэй холбогдож тодруулахад “Буруу оноштой мэс ажилбарын дараагаар охин маань их өвдөлт мэдэрч, биеийн байдал нь хүндхэн байсан ч одоо гайгүй.  Гэхдээ охины минь эрүүл мэнд, амь насаар тоглох шахсан тэр согтуу эмчид үнэхээр гомдолтой байна. Хөдөөний биднийг яаж ч болно гэсэн хандлагатай байх шиг санагдсан. Тэр аймшигтай, ямар ч үр дүн байхгүй хагалгааны дараа охины минь умайн мах тасарч унасан. Тэгээд мэс засал хийсэн эмчтэй холбогдох гэсэн боловч амралтанд явсан гэж байна лээ. Сураг сонсох нь ээ, шал согтуу мөртлөө үзлэг хийгээд явж байна гэх юм. Тэр хотоос ирсэн согтуу хүмүүс бүгдээрээ их эмч н.Дашзэвэгийн найз нөхөд юм байна лээ. Арга барагдаад холбогдох байгууллагуудаас нь лавлаж, эдгээр хүмүүсийн тухай асуухад “Хөдөө орон нутагт тийм томилгоо хийгээгүй” гэсэн албан ёсны хариу өгсөн. Гэтэл өөрсдийгөө “Хотоос томилогдож ирсэн” гээд байгаа тэр эмч нар чухам хаанаас гараад ирэв ээ” хэмээн халаглаж суусан юм.

Өнөөдөр хэн дуртай нь цагаан нөмрөг зүүж, өөрийгөө “Эмч” гэж хэлээд хэдэн халтар төгрөгийн төлөө хүний амь нас, эрүүл мэндээр “тоглодог” болчихсон бодит жишээ энэ биш гэж үү. Сумын эмнэлгийн их эмчийн найз нар гэдгээрээ түрий барьж, хөдөөгийн ядарсан иргэдийн эрүүл мэндээр далимдуулж мөнгийг нь шулах гэхдээ мэс барьж яваа тэдгээр хүмүүсийг эрүүл энхийг сахиулагчид биш яргачид гэвэл яг таарна. Одоогоор өвчтөн Б-гийн биеийн байдал тийм ч сайнгүй байгаа төдийгүй согтуу эмчийн балгаар умайн мах нь тасарч унасан болохоор ирээдүйд эх болж чадах эсэх нь ч эргэлзээтэй байгаа юм. Цаашид уг хэргийн талаарх дэлгэрэнгүй мэдээлэл болон мэс барьсан яргачин эмч нарын тухай үнэн бодит мэдээллийг та бүхэндээ хүргэсээр байх болно.    

С.Цахиур

www.zone.mn

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...