2013 оны 9 сарын 24
Н.Ган-Од буюу Ганбууш: Нүцгэн биеэ тольдоод өдөр бүр өөртөө дурлаж явна

Тайланд улсад хүйс солиулах мэс засал хийлгээд жинхэнэ утгаараа эмэгтэй хүн болсон Ганбууш өөртөө Н.Ган-Од гэх сонсголонтой нэрийг өгч байлаа. Гэвч хагалгааны дараахи таамаглаагүй хүндрэл гарч, жил гаруй хугацаанд бие нь зовиуртай явсан тэрбээр урологи болон хөх хийлгэх мэс засалд орохын тулд дахин Тайландыг зорьсон юм. Хагалгааны нийт зардал нь 30 орчим мянган ам.доллар болсон бөгөөд тус улс руу зорчих хоёр талын зардлыг нь "Airbox" олон улсын билетийн касс -ынхан хариуцсанд ихэд талархаж буй гэнэ лээ. “Хүйсийн тодорхой бус байдлыг арилгахын төлөө тэмцэгч” хэмээн өөрийгөө нэрийдсэн Ганбууш буюу Н.Ган-Одтой уулзаж ярилцсанаа хүргэе.

-Хоёр хагалгаанд ороод нэлээд жин хассан харагдлаа. Эрүүл мэндийн байдал ямархуу байна даа?

-Бүрэн эмчилгээ хийлгээд биеийн байдал маань аягүй сайн байгаа. Өнгөрсөн сарын 29-нд “Ийгл” телевизийнхэнтэй хамт Тайландыг зорьж, энэ сарын 02-нд хоёр хагалгаа хийлгэсэн. Тус телевизийн уран бүтээлчид миний тухай бүрэн хэмжээний баримтат кино хийж байгаа учраас хамт явсан юм. Томоохон хэмжээний хоёр хагалгаанд орох зардлыг маань уул уурхайн компанид ажилладаг 20 гаруй залуус олж өгсөн. Тус бүр цалингаасаа 150 ам.доллар цуглуулж “Таны хичээл зүтгэлийг үнэлээд бодит тусламж өгөхийг хүссэн юм” гээд надад 30 мянган ам.доллар хандивлалаа. Өнгөрсөн жил хагалгаанд ороход ихэвчлэн эмэгтэйчүүд тусалсан бол, энэ удаад дан эрчүүд тусалж байгаад их сайхан сэтгэгдэл төрсөн шүү. Найз нөхөд, танил хүмүүс минь бус огт танихгүй, харин гадаад дотоодод сургууль төгсч ирсэн эдгээр залуус надад хүсэл мөрөөдлөө биелүүлэх урам зориг өгч байгаад баяртай явна. Хоёр хагалгаанд зэрэг орсон болохоор тодорхой хэмжээний асаргаа сувилгаа хэрэгтэй нь үнэн. Тэдгээр залуус надад иж бүрэн тавилгатай хоёр өрөө байрыг бүтэн жилээр нь түрээсэлж өгсөн. Мөн хоол хийх, гэр орон цэвэрлэх, хувцас хунар угаах зэрэг ажлыг гэрийн үйлчлэгчид даатгасан. Хоёр өрөө байранд ганцаараа байснаас хавьгүй дээр, ханьтай амар л юм. Надад тусалсан тэр сайхан сэтгэлтэй хүмүүсийн нэр болон ажлын хаягийг тодорхой хэлээд яахав. Ямар ч байсан, энэ бүхэнд хүргэж өгсөн тэдэндээ маш их баярлаж байгаагаа танай сайтаар дамжуулан уламжилья.   

-Өнгөрсөн жил 14 настай охины сав суулгуулсан ч, таарч тохирохгүй бол авахуулж магадгүй тухайгаа ярьж байсан. Сая тэр саваа авахуулав уу, аль эсвэл..?

-Үгүй ээ, авахуулаагүй. Шээсний суваг жаахан “асуудалтай” байсан болохоор доошоо байнга шингэн дусагнаад их хэцүү явсан. Тайландчууд их айхтар юм билээ. Өнгөрсөн жил хагалгааныхаа төлбөрийг гүйцээж өгөөгүй учраас “Энэ эргэж ирэхгүй яадаг юм” гээд дутуу эмчилгээ хийсэн байна лээ. Шээс дусагнаад байж сууж чадахгүй болохоор нь эмнэлэгт хандахад “Тэр хийлгэсэн газартаа оч” гээд хүлээж аваагүй. Аргагүйн эрхэнд дахиж Тайланд руу явж үлдэгдэл төлбөр дээрээ нэмж мөнгө төлөөд бүрэн эмчилгээ хийлгэлээ. Энэ удаагийн хагалгаанд нийтдээ 15 мянган ам.доллар зарцуулсан. Бас хажуугаар нь  8000 ам.доллараар хөх хийлгэсэн. Учиргүй том биш, бас жижигхэн ч биш. Биед маань яг тохируулж хийсэн G хэмжээтэй хөх. Хүмүүс хараад “Их том байна” гээд л байгаа. Одоо эрүүл мэндийн хувьд ямар ч асуудалгүй, жинхэнэ төгс эмэгтэй боллоо. Харин сексийн харилцаанд орох тал дээр зургаан сар тэвчих хэрэгтэй байна. Бараг ирэх жилийн гурав, дөрөвдүгээр сараас наашгүй юм болох нь ээ. Тэр хүртэл онгоноороо л явж байхаас.(инээв)

-Хүйсээ солиулж ирснээс хойш сексийн талаархи яриа тань хэсэгтээ л олныг гайхуулсан. Зургаан сарын дараа дахиад өөр юм хэлээд гарч ирэх юм биш биз?

-Ёстой үгүй. Сая хийлгэсэн хоёр хагалгаанд маань эдгэрэлтийн хугацаа хэрэгтэй. “Зургаан сар яаж зүгээр суух вэ” гээд шүдээ янзлуулах санаатай явна. “Басхүү имплант” эмнэлгийн захирал н.Басхүү, “Люминер” эмнэлгийн захирал н.Ганхүү зэрэг шүд, эрүү нүүрний гажиг заслаар Монголдоо тэргүүлэх мундаг эмч нар надад туслахаар болсон. Энэ олон мэс засал хийлгэчихээд шүдээ янзлуулахаас айгаад яахав дээ. Жинхэнэ эмэгтэй хүн болоод ирсэн чинь шүд аягүй муухай харагдаад байгаа байхгүй юу. н.Басхүү эмч, н.Ганхүү хоёр миний шүдийг харчихаад “Ямар аймаар хайр гамгүй хэрэглэсэн шүд вэ” гээд гайхаж байсан. Одоо бараг эцсийн хугацаа нь болчихсон энэ хэдэн шүдийг аваад оронд нь цирконон шүд суулгана гэсэн. Компьютерээр оношилж, Америкаас авчирсан тусгай материалаар хийх энэ шүдний ажилбар 20 мянган ам.долларын үнэтэй юм билээ. Уг нь зургаан сарын дотор бага багаар хийх ёстой байсан ч, би жаахан яаруулаад нэг өдөрт багтааж хийлгэхээр болсон. Дараа нь нэг танил хүүхнийхээ тусламжтайгаар Солонгост гоо сайхны хагалгаа хийлгэнэ. Монголоос явахын өмнө "Гран при" эмнэлэгт гоо сайхны эмчилгээ хийлгэж, зөвлөгөө авахаар болсон. Тэр эмнэлэгт эмчилгээний болон залуужуулах зорилгоор нүүрэнд утас гүйлгэх, тухайн хүний өөрийнх нь  цусыг авч нүүрний арьсанд тарих зэрэг олон төрлийн үйлчилгээ үзүүлдэг юм билээ. Тэгэхээр би гоо сайхны хагалгааны талаар зөвлөгөө авахаас гадна өөрийнхөө арьсны эрүүл ахуйд анхаарах юм. Хоёр талын онгоцны тийз, тэнд байх хугацаанд хэрэглэх зардлынхаа мөнгийг өөрөө олох ёстой болчихоод байна. Солонгосын виз гаргуулна гэдэг чинь их асуудалтай эд юм. Банкинд арван сая төгрөг байршуулах ёстой ч гэнэ үү. Би тэнд  үхсэнээ хийж үлдэх юм бэ. Гоо сайхны хагалгаа хийлгээд ирэхэд л болоо ш дээ. Ямар одоо 60 нас хүрчихээд Солонгост “харлаж” ажил хийх гэж байгаа биш, ёстой уучлаарай биз дээ. Тэтгэвэрт гарсан болохоор тийм их мөнгө байршуулах шаардлагагүй байж болно. Гэхдээ виз гаргаж өгдөг хүмүүс нь их бага хэмжээгээр бизнес хийгээд хэцүү юм шиг байна лээ. Би ямар байр, машин авья гэж гуйгаад байгаа биш. Монгол Улсын Ерөнхий сайд Н.Алтанхуяг сайдад хандаж “Өөрийнхөө нэр нөлөөг ашиглаад гоо сайхны хагалгаа хийлгэхэд минь туслаач” гэж хүсмээр байна.

-Та уг нь Солонгост биеийн илүүдэл өөхнөөсөө авахуулаад хөх хийлгэнэ гэж ярьж байсан. Тайландад ямар хөх хийлгэчихэв ээ?

-Солонгост тэгж хийдэг нь үнэн, гэхдээ гурван жилийн дараа шалчийчихдаг гэсэн. Тайландад хийлгэсэн хөх бол насан турш байх эд. Хиймэл эд боловч хагалгааны дараа өвдөж хавдах нь бага байсан. Хааяа доошоо тонгойхоор час хийгээд өвддөг л юм. Тиймээс дандаа гэдийж явах ёстой юм билээ.

-Силикон уу аль эсвэл тусгай уусмалтай шахмал эд үү?

-Юуг нь мэдэхгүй ээ, шууд л хийлгэчихсэн. Гурваас зургаан сарын дараа ердийн эмэгтэйчүүд шиг хэвийн хэмжээний хөхтэй болчихно. Эмч маань надаас “Юу хийх гэж байгааг харах уу” гэхээр нь “Хараад яахав ээ, танд итгэж байна” гээд үзээ ч үгүй. Өдөр бүр усанд ороод байвал суганы шарх хурдан эдгэрч, хөх зөөлөрч эхэлдэг юм байна лээ. Би одоо гайгүй турчихсан. Өглөө болгон л толинд нүцгэн биеэ харж баясах юм байна ш дээ. Үүнээс илүү жаргал алга.(инээв)

-Нүцгэн биеэ “алдаршуулаад” л байна уу?

-Хөх, бэлхүүс гээд л биеийнхээ галбирыг харж, өдөр бүр өөртөө дурладаг боллоо. Хүмүүс гоо сайхны мэс засал их хийлгэхээр донтдог гэж ярьдаг юм билээ. Би лав донтоогүй. Өөрийнхөө дутуу юмыг л нөхөх гээд зүтгэж байна. Насны доройтлоор шүднүүд маань унаж байгаа болохоор муухай юм. Дээр үед бол суга татаад л авчих байсан биз. Харин одоо тэгж авахуулбал нүүрний арьс унждаг гэсэн. Шинэ шүд хийлгэвэл хацарны арьс унжих нь багасч, нүүр өргөгдөөд ирдэг юм билээ. Ямар ч байсан, шүдээ хийлгэчихээд нүүрнийхээ арьсыг татуулна аа. Би тэгж илүү дутуу ботокс энэ тэр шахуулахгүй. Янз бүрийн тариа тариулж, алтан утас гүйлгээд яах юм бэ. Ботокс чинь элгэнд их муу, таарах таарахгүй хүн гэж бий. Хамгийн найдвартай арга нь арьсаа татуулах.

-Таны хөхөнд хэдэн жилийн баталгаа өгсөн бэ. Хиймэл эд биедээ суулгаснаас болж хорт хавдар үүсэх нь бий гэлцдэг?

-Үгүй ээ, миний хөх тийм биш. Тэр хорт хавдар чинь жинхэнэ эмэгтэйчүүдэд үүсдэг байхгүй юу. Хүүхэд хөхүүлэх болон бусад зүйлээс шалтгаалж, хиймэл эдийг нь хөхний булчингийн цаагуур хийдэг юм билээ. Миний хувьд хөхний булчингийн наагуур нь хийсэн. Н.Оюун эмч намайг Тайландад хөх хийлгэсэн нь дээр гэж зөвлөсөн байхгүй юу.  

-Янз бүрийн мэс засал хийлгэсэн болохоор таныг дауны хомсдолтой хүүхэд төрүүлж магадгүй гэлцээд байгаа. Энэ үнэн гэж үү?

-40 нас гартлаа огт хүүхэд төрүүлээгүй хүмүүст ийм зүйл тохиолдох нь элбэг гэсэн. Ер нь  хүүхэд гаргах уу, үгүй юу гэдгээ сайн бодох хэрэгтэй юм байна. Тэгээд ч 60 хүрч байж гаргасан хүүхэд маань хэзээ 20 нас хүрч намайг тэжээж тэтгэх юм бэ, хэцүү ш дээ. Биеэ  сайн тэнхрүүлж, бас бус олон асуудлаа шийдсэний дараа тэр талаар бодно оо. Надад тусалсан залуус “Одоохондоо жаахан асуудалтай байна. Уул уурхайн хуулинд ямар өөрчлөлт оруулахыг харзнаж байя. Хэрвээ гайгүй байвал ирэх жилийн дөрөв, таван сараас танд байр авч өгнө өө. Санаа зовох хэрэггүй” гэж амлахад нь ямар их баярласан гээч. Ардчилсан ерөнхийлөгчийн шийдэж чадаагүй асуудлыг тэд нар шийдээд өгчихлөө шүү дээ, надад. Би одоо тэд нарын ажилладаг компанид олон нийттэй харилцах албаны ажилтан болсон. Тусалж дэмжсэн сэтгэлийнх нь хариуд өөрийн чадах зүйлээр хариу бэлэг барихыг хичээж явна. Мөн надад үргэлж тусалж дэмждэг "Урлах эрдэм" дээд сургуулийн багш, хүний эрхийн хуульч н.Булган багшдаа баярласнаа дамжуулж хэлмээр байна.

-“Жинхэнэ эмэгтэй хүн болчихвол нүцгэн зургаа хоёр өрөө байрны үнээр авахуулна” гэж байсан. Тэр бодол тань хэвээрээ юу?

-“Playboy Mongolia” сэтгүүлийнхэнтэй ярьсан юм бий. Харин одоо миний тухай баримтат кино хийж байгаа “Ийгл” телевизийнхэнтэй ярилцаад нүцгэн зургаа авахуулах гэж байгаа. Шинэ содон загвартай гоё тавилга оруулж ирдэг дэлгүүрт юмуу аль эсвэл орчин нөхцөл сайтай газарт зураг авья гэж яриад байгаа. Зарим хүмүүс намайг “Тариан талбай,  байгалийн дунд зураг авахуулаач” гээд л шал хөсрий юм яриад байгаа байхгүй юу. Арай гэж эмчилгээ хийлгэчихээд тэгж шалдан нүцгэн явбал даарч хөрөөд баларна биз дээ.

-Та тэднээс мөнгө авч байгаа юу?

-Үгүй ээ, бидний дунд ярьж тохирсон асуудал байгаа. Үнэгүй юм гэж байх биш. Тус телевизийн баримтат кинонд оролцож, нүцгэн зураг авахуулахаар тохирсон. Мэс засал хийлгэхийн өмнө болон дараа нь баахан зураг авсан.  

-Төгс эмэгтэй болсон Ганбуушийн анхны шөнө 100 сая ам.долларт хүрч, их мөнгө амласан эрчүүд хүрээлж эхэлсэн гэдэг. Одоо ч иймэрхүү санал бүр нэмэгдэнэ биз?  

-Ийм санал тавьсан дөрвөн хүн байгаа ч, жаахан итгэл үнэмшил буурч эхэллээ. Сая намайг хагалгаанд орох гэж байхад тэд нар сураггүй алга болчихсон. Надад туслах албагүй ч гэлээ, үнэхээр сексийн харилцаанд орох гээд байгаа юм бол ядарсан үед минь их бага хэмжээгээр харж хандах ёстой ш дээ. Тэгээд хагалгаа хийлгэсэн хойно гарч ирээд тэр яриагаа давтаад уналаа. Шонхорын наймаа хийдэг нэг залуу сая надад ийм санал тавихаар нь “400 сая ш дээ” гэсэн чинь “Газар дээр нь бэлнээр тооцоо хийе” гэдэг байгаа. Тэр чинь зүгээр л нэг тоглоом байсан шүү. Сав суулгуулж, хөх хийлгэсний дараа бие физилогийн хувьд өөрчлөлт явагдаад дурлах мэдрэмж нь нэмэгддэг гэж манай эмч хэлсэн. Би одоо ямар хүнд хайртай болох юм бол доо... Хэлж мэдэхгүй л юм, магадгүй Монгол эрчүүдийг алсаас хайрлах байх. Хэрэв үнэхээр хайр дурлалтай учирвал тэр хүндээ л онгон биеэ өгдөг юмуу гэж бодоод байгаа ш дээ.

-Өнгөрсөн хугацаанд галзууртлаа дурлаж, гайхамшигтай сайхан мэдрэмжийг огт авч байгаагүй гэж үү?

-Урьд нь болж өнгөрсөн амрагийн асуудлаа жинхэнэ хайр дурлал гэж үзэхгүй байна. Хүмүүс намайг өнгөрсөн амьдралаа үгүйсгэлээ гэж яриад байгаа. Тэгээгүй ш дээ, би. Миний амьдралд жаргалтай сайхан үе олон байсан Эмээ маань намайг насан туршдаа ганцаараа явна гэдгийг мэдсэн юм шиг эмэгтэй хүний хийж чадах бүхнийг зааж, амьдралын ухаанд сургасан. Гайгүй боловсрол эзэмшиж, урлагийнхантай цуг Европын орнуудаар хөндлөн гулд аялж явлаа. Хүмүүс өчнөөн юм мөрөөддөг, тэр бүхнээ биелүүлсэн нь ховор. Миний хувьд хэзээ ч биелэхээргүй мэт том мөрөөдөл сэтгэл зүрхэндээ тээж, түүнийхээ төлөө ёстой л нойлоос эхэлсэн дээ. Энэ миний гавьяа биш, сэтгүүлч та бүхний ач тус. Аль 1990-ээд оноос эхлээд л “Халуун хөнжил” сонинд ярилцлага өгч эхэлсэн хүн шүү дээ, би. Янз бүрийн сэтгүүлчидтэй уулзаж, элдэв асуултад хариулсаар байгаад өөрийн эрхгүй амьдралын сэтгүүлч болсон. Тиймээс миний далд фронтын тэмцэгч болж, энэ бүхэнд хүрэх бололцоог бүрдүүлж өгсөн сэтгүүлчиддээ баярлаж явдаг даа.

-Жил зургаан сарын хугацаанд сексгүйгээр амьдарна гэдэг их л хэцүү байх?

-Өнгөрсөн жил тасралтгүй шингэн дусагнаад юун илүү дутуу юм бодох манатай явсан. Секс хиймээр санагдаад хүнтэй унтвал унтчихаар л байсан. Даанч эрэгтэй хүний өмнө янз бүрийн шингэн гоожуулаад байвал яаж таатай сэтгэгдэл төрүүлэх билээ дээ. Тэгээд ч тэр үед хайртай хүн байгаагүй юм чинь. Одоо бол амьдралд янз бүрийн өөрчлөлтүүд гарч ирж байна ш дээ. Хагалгааны шарх сайн эдгэрээгүй болохоор сексийн тухай бодож зүрхлэхгүй нь. Шүд хийлгэсний дараа гоо сайхны хагалгаанд орно гэсээр байтал ахиад нэг жил болох нь. Уг нь ирэх хавар гуравдугаар сарын 10-наас дөрөвдүгээр сарын 19-ний хооронд буюу туулай сард онгон биеэ хөндүүлбэл үлдсэн насандаа аягүй аз жаргалтай амьдарна гэсэн байхгүй юу. Тэгэхээр энэ туулай сараараа аягүй гоё байя гэж бодоод байгаа.

-Ааш зан, сэтгэл санааны хувьд янз бүрийн өөрчлөлт гарч байна уу?

-“Эмэгтэй хүн бүх зүйлийг тэсвэрлэдэг, ганцхан хайр сэтгэл дээр л амаа барьж чаддаггүй” гэж сонссон. Би урьд нь хайр дурлалын талаар олон хүнд зөвлөгөө өгдөг байсан. Харин өөрөө жинхэнэ эмэгтэй хүн болчихоод анхны хайртайгаа учирвал яах юм бол доо, бүү мэд. Сэтгэл санааны хувьд аягүй тогтворгүй байгаа. Аймаар амархан уйлна, гомдоно, хурдан хямарна. Өнгөрсөн жил тийм байгаагүй ш дээ. Хөх хийлгэсний дараа их ааштай болж байх шиг санагдсан. Урьд нь дургүй хүргэвэл зад агсам тавиад л явдаг байсан даа. Хүмүүс надад “Мянган жилийн гавьяаг нэг удаагийн агсам тавилтаар баллачих юмаа” гэж хэлдэг байсан. Би бааранд шатаагч хийж, орлого оруулах гэж уудаг байсан. Одоогийн яриагаар бол, ширээний хүүхэн л гэсэн үг. Тэрнээс биш, энгийн үед өмнөө архи тавиад уух сонирхол байдаггүй. Одоо биеийн байдал, шүдний асуудал маань энэ бүхнийг зуун хувь хориглож байгаа болохоор амсах ч үгүй. Архи, тамхинаас гарна гэдэг бол цэвэр сэтгэлзүйн асуудал. Гэхдээ би ямар архичин байсан биш “Гарлаа, орлоо” гэж ярих нь утгагүй. Угаасаа ямар ууж иддэггүй хүн гэж байх биш. Кока кола ундаанд нугасгүй дуртай байсан болохоор шүд маань ингэж муудсан. Дахиж уухгүй л байхаас.

-Таны хувьд, гоёл зүүсгэлээ хэрхэн зэхдэг вэ. Брэнд бүтээгдэхүүн сонирхоно биз?

-Миний өдөр тутмын хувцсыг “Нинжээ” салон, харин зураг авалтад хэрэглэх зээгт наамалтай гоёлыг “Ничен” салонынхан хийж өгдөг. Үнэтэй брэндийн гоё гутлуудыг найз нөхөд маань бэлэглэнэ. “Эко”, “Лили”, “Гоо хатан”, “Шварцгоф” зэрэг гоо сайхны дөрвөн ч салон надад үнэгүй үйлчилдэг. Хүмүүсийн хэлдгээр, би бараг нэг ч төгрөгийн зарлагагүй амьдарч байна. Тэтгэврийн мөнгө амьдралд минь хангалттай хүрдэг болохоор зарлага гарахгүй.

-Монголд анх удаа хүйс солиулах мэс засал хийлгэсэн тухайгаа албан ёсоор зарлалаа. Магадгүй энэ бүхний дараа таниас зөвлөгөө авч, ийм сонголт хийх гэсэн хүмүүс ирж байв уу?

-Үгүй ээ, битгий ирээсэй гэж бодож байна. Энэ тал дээр үндэсний аюулгүй байдлын бодлого байх ёстой. Монгол эрчүүд маань өнөөдөр хаана байна вэ. Нэг хэсэг нь шоронд орж, нөгөө хэсэг нь цэрэгт явчихсан. Бас нэг хэсэг нь лам болчихсон байхад, нөгөө хэсэг нь гадаадад ажиллах гээд гарчихсан байдаг. Үлдсэн эрчүүд нь хүйсээ солиулаад эмэгтэй болчихвол Монгол Улс маань яах билээ дээ. Миний хувьд, хүйсийн тодорхой бус байдалтай явсан учраас энэ мэс заслыг хийлгэсэн. Эрүүл мэндийн яамныхан надад таван сая төгрөг өгөөгүй нь их зөв шийдвэр байж. Хэрэв тэр мөнгийг өгсөн бол миний араас хэдэн ч хүн ийм хагалгаанд орох гэж хөөцөлдөх байсан юм билээ, бүү мэд. Энэ бүхэн надаар дуусаг гэж боддог. Хүйс солиулна гэдэг үнэхээр хүнд хагалгаа, тэр бүхнийг давж туулах хэцүү. Залуу насандаа болчимгүй шийдвэр гаргаж хүйсээ солиулчихаад хөгширсөн хойноо “Үр удмаа үлдээх минь яав даа” гэж харамсах вий.

-Жинхэнэ эрэгтэй хүн хүйсээ солиулсан ч, тэр бүхний дараахи хүндрэлүүдийг давж чаддаггүй гэж сонссон?

-Үнэн шүү. Цэл залуу насандаа хийлгэчихээд үр удмаа үлдээж чадаагүйдээ хожим нь харамсах вий. Тайландад төрөөгүйдээ би маш их баярлаж байгаа. Тэр 65 сая хүний дунд төрчихсөн бол ёстой уучлаарай ш дээ. Тайландын халуун агаар, хоол хүнс гэж хэрэг алга аа. Ард түмэн нь ямар ядуу амьдралтай гэж санана. Эмэгтэй хүүхэд төрвөл биеэ үнэлэгч болгох гээд их баярладаг. Эрэгтэй хүүхдүүд нь 18 нас хүрээд эмэгтэй болох эсэхээ шийддэг. Намайг эмнэлэгт хэвтэж байхад аягүй том биетэй, манайхаар бол бөх байрын нэг залуу хүйс солиулах мэс засалд орж байсан. “Тэр том биеийг одоо яана аа” гээд бодож байсан чинь түүний гар, хөлийг хэд хэдэн газарт нь хугалаад ясыг нь нарийсгасан. Дараа нь хөл, гарны махыг нь шулаад багасгаж байх жишээтэй. Би хажууд нь бараг нарийхан төрсөндөө баярлаад үхэх шахлаа. Надад тэгж зовж, мах шөлөө шулуулах шаардлага алга. Бас нэг залуу шанаагаа нарийхан болгохын тулд хусуулж байна лээ. Энэ төрлийн мэс заслыг Тайланд улс өөрийн иргэддээ хямдралтай үнээр хийдэг юм билээ. Өнгөрсөн хугацаанд нийт 7200 хүн хүйс солиулах мэс засал хийлгэснээс 400 нь энэ байдалдаа дасан зохицож чадахгүй амиа хорлосон гэдэг. Үлдсэн нь ямар нэгэн аргаар амьдралаа залгуулаад явж байгаа. Ийм мэс засалд орсон хүн “шинэ бие”-э өөрийн болгоно гэдэг их хэцүү. Хоёроос гурван жил зовно шүү дээ, дор хаяж. Миний хувьд, доод эрхтнээс бусад нь гайгүй байсан нь яамай. Гэхдээ онгоноо цоолуулчихаар яах юм, бүү мэд. Цаашид ямар үр дагавар гарахыг мэдэхгүй юм. Арьс тэнийгээд залуужиж байгаа нь сайхан ч, шүд маань гутаагаад гоё харагдахгүй байх шиг ээ. Тэгэхээр одоо хийлгэхээс өөр арга алга. Бааранд олон жил ажилласан болохоор нүүрний арьс нүхжилт ихтэй. Ямар ч байсан, шүд хийлгэчихээд Солонгосыг зорино. Тэнд чихний ар талаас мөгөөрс авч хамрыг маань өндөрлөөд, нүднийхээ доод талын зовхи болон хацрын арьсыг татаж өгнө гэсэн.

Ярилцсан Р.МӨНГӨН

www.zone.mn

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...