ОХУ руу визгүй явдаг болсноос хойш урд зүгийг зорих манай наймаачдын тоо харьцангуй цөөрсөн боловч хэврэг хэдий ч үнэ хямдтайг нь бодоод зарим ганзагачид маань Эрээн хотыг зорьсоор л байна. Хятадын гаалийг цэвэр цэмцгэр, үйлчилгээ нь хөнгөн шуурхай гэлцэн ам сайтай байдаг манайхны сайхан сэтгэл рүү ус цацах мэт бүдүүлэг үзэгдэл саяхан урд хил дээр гарчээ.

Юунаас болсныг бүү мэд, ямартай ч монгол бүсгүйг байдгаараа үсдчихсэн дээрэлхэж байгаа хятад гаалийн байцаагчийн зураг олон нийтийн сүлжээнд хүмүүсийн дургүйцлийг төрүүлсээр байна. 

90-ээд оны эхээр зах зээл дөнгөж эхлэн, урд зүгийг зорьж байхад тухайн үеийн Эрээн хот бараг л гахайн оромж шиг юм байсныг хэн хүнгүй санаж байгаа байх. Харин өнөөдөр танигдахын аргагүй, орчин үеийн тансаг хот болжээ. Хүмүүс нь ч бас танигдахын аргагүй давилуун, их зантай болчихож. Ямар сайндаа л, одоо монголчуудыг гаалийн байцаагч нь хүртэл үсдэж зодохдоо тулхав дээ. 

Санаагаар болдогсон бол, тэдний муусайн хогийг зөөж орлого оруулахгүйгээр, өөрсдөө дотооддоо хэрэгцээгээ хангадаг болчихвол хичнээн сайхан...

Б.Тамир

Эх сурвалж: ZONE.MN