Хэлгүй дүлий, хөгжлийн бэрхшээлтэй хүүхдүүдэд зориулсан, улсдаа ганцхан шахуу 29-р тусгай сургуулийн хүүхдүүд өнгөрөгч сараас эсэргүүцлийн арга хэмжээ эхлүүлэн, шуугиан дэгдээгээд байгаа билээ. Тэд багш нарынхаа дохиог ойлгохгүй байгаа учраас хичээлээ ойлгодоггүй, иймд багш нарын дохиог сайжруулж, дохионы хэл дээр хичээлээ чадварлаг зааж байхыг хүссэн юм.

Тусгай сургуулийн багш нар сурган хүмүүжүүлэх ухаанаас гадна тусгай боловсролын сурган хүмүүжүүлэх арга барилд суралцах ёстой. Гэтэл өнөөгийн байдлаар тус сургуульд ажиллаж буй багш нарын ихэнх нь шаардагдах ур чадварыг төдийлөн сайн эзэмшээгүй бололтой.

Хүүхдүүдийн дунд өрнөсөн эсэргүүцлийн жагсаал, хичээл хаялт зэрэгтэй холбогдуулан БСШУС-ын сайд Ж.Батсуурийн тушаалаар ажлын хэсэг гарч, тус сургуульд шалгалт хийж, дүгнэлтээ гаргасан байна. Тус яамнаас гаргасан дүгнэлтээр, энэ сургуулийн багш нарын 94 хувь нь дохионы хэлний анхан шатны мэдлэгтэй гэдэг нь тогтоогджээ. Харин дохионы хэлний мэргэжлийн 21 багшаас шалгалт авахад 44 хувь нь хангалттай байсан бол 56 хувь нь хангалтгүй гэсэн үнэлгээ авсан байна. Тиймээс тус сургуулийн хүүхдүүдийн тавьсан шаардлагын дагуу багш нарын дохионы хэлийг сайжруулах шаардлагатай гэсэн дүгнэлтэд хүрсэн аж.

Мөн тус сургуулийн зарим эмэгтэй сурагчид Мэдээ.мн сайтад ярилцлага өгөхдөө охидод бэлгийн дарамт үзүүлдэг гаж донтой багш нар байдаг тухай өгүүлснээс үүдэн 29-р сургуулийн багш, ажилтнууд хэвлэлийн хурал хийж байсан. Тэд хөгжлийн бэрхшээлтэй хүүхдүүдийнхээ эсрэг өмгөөлөгч хүртэл хөлслөөд тэмцэж эхэлсэн нь олон нийтэд төдийлөн таалагдаагүй. Мөн өнөөдөр гэхэд, тус сургуулийн багш нар Цагдаагийн газрын үүдэнд эсэргүүцлийн жагсаал хийж байгаа гэнэ. Асар идэвхтэй тэмцэж байнаа, тэд! Хэний эсрэг тэмцээд байгаагаа ухварлан бодвоос ичих мэдрэмж төрдөггүй юм байх даа... Хэлгүй дүлий, хөгжлийн бэрхшээлтэй хүүхдүүд худал яриад, хор найруулаад байна гэхэд баргийн хүний ой ухаанд төсөөлөгдөхгүй л байх. 

Тус сургуулийн захирал Батсайханы хэлсэн үгс өнөөдөр бараг л онигоо болон яригдаж байна. Бэлэг их өгдөг болохоор бэлгийн дарамт үзүүллээ гэх ухааны юм ярьсан, мөн хэлгүй дүлий хүүхдүүдийг сэтгэцийн өвчтэй мэтээр дүрслэн, тэд нарын улирал эхлээд ийм зүйл ярьж байгаа гэжээ. Энэ бол арай л хэтрүүлсэн, бүдүүлэг дүгнэлт юм.

Захирлын ярьсан үгстэй холбоотой шум өнөөдөр соошлд нэлээн эрчийг авсан гэхэд хилсдэхгүй. Түүнд дургүйцсэн хүмүүс: “эрхэм захирлын өөрийнх нь сезон эхэлсэн юм биш үү” гэлцэж байв.  Үнэхээр ч түүний ярьсан зүйлс өдий хэрийн хариуцлагатай албан тушаал хашдаг, боловсролтой, эрүүл саруул хүний амнаас гарсан гэхэд бараг итгэмээргүй. Ийм л хүмүүс энд тэндхийн дарга, даамал хийгээд байгаа нь угтаа улсын хөгжилд ихээхэн саад, чөдөр болж байгаа гэлтэй.

29-р сургууль мэт иймэрхүү тусгай зориулалтын байгууллагыг удирдах албан тушаалд амбиц багатай, эрүүл саруул зөв хандлагатай, зөөлөн сэтгэл зүрхтэй хүнийг томилж байвал тэдгээр нийгмийн хайр халамж шаардлагатай зорилтот бүлгийн хүүхдүүдэд томоохон буян үйлдсэн хэрэг болох биз ээ...

Д.Мигаа

Эх сурвалж: ZONE.MN