Халимаг улс эдийн засгийн шинэ сайдаараа 33 настай Зоя Санжиеваг томилжээ. Тэрээр хүмүүнлэгийн үйлсэд идэвхтэй оролцдогоороо улсдаа алдартай бизнес эрхлэгч бүсгүй юм байна.

Шинээр томилогдсон сайд бүсгүй тэр дороо л хэвлэлийнхний анхаарлын төвд орж чадсан аж. Тэрээр зөвхөн залуу, амжилттай бизнес эмэгтэй гэдгээр бус, өөрийгөө маш сайхан авч явдагаараа гайхагддаг гэнэ.

Сэтгүүлчид Зояг хамгийн царайлаг сайд хэмээн хэдийн нэрлэж амжаад, түүний зураг хөргийг хаа сайгүй нийтэлж, нөгөөх нь ч таатай нь аргагүй соошлоор тэдгээр зургуудаа бусадтай хуваалцаж байгаа аж.

Эдийн засгийн шинэ сайд бүсгүй өмнө нь үсчин, гоо сайхны салонуудын сүлжээг тэргүүлдэг байсан бөгөөд тэр хэрээрээ бусдын нүдэнд үргэлж гоё сайхан харагддаг байсан гэнэ.

Түүний тухай бичсэн сэтгэгдлүүдээс харахад, эх орон нэгтнүүд нь түүнийг Халимагийн “Вера Брежнева” хэмээн нэрлэж, мөн Төрийн Думын депутат Наталья Поклонская-тай зүйрлээд амжжээ. Зарим нь түүний ямар ч өө сэвгүй, хүүхэлдэй мэт гоёмсог төрхийг хараад: “Одоо хүлээн авсан албан тушаалын хариуцлагаа үүрч чадах болов уу, яах бол? хэмээн эргэлзээд байгаа бололтой.  

-       Миний өмнө маш их ажил байгаа. Иймээс надад итгэл хүлээлгэсэн Халимагийн төрийн тэргүүн болон улс орныхоо иргэдэд талархсанаа илэрхийлээд, ажлаа үр дүнд хүргэхийн тулд бүхий л хүчээрээ хичээн зүтгэх болно хэмээн Санжиева хэвлэлд ярилцлага өгөхдөө дурдсан байна.

Зоя Санжиева Элстэйн лицей сургуулийг төгсөөд, 2006 онд Санкт-Петербург дэх Хүмүүнлэгийн академийг хэл шинжлэлийн мэргэжлээр төгссөн байна. 2014 оноос ОХУ-ын Гадаад харилцааны яамны Дипломат Академид “Олон улсын харилцаа” мэргэжлээр суралцан, мөн Оросын ерөнхийлөгчийн дэргэдэх Улс ардын аж ахуй, төрийн албаны академид “Улсын эдийн засгийн зохицуулалт” сэдвээр мэргэшин суралцаж байгаа аж.

Тэрээр англи, франц хэлтэй. Нөхөр, хоёр хүүхдийн хамт амьдардаг. Монгол угсааны нэгэн гоо бүсгүй шинээр сайдын албан тушаалд томилогдсонд элэг нэгт монголчууд нь баярлаж байгаа нь гарцаагүй. Түүнд АМЖИЛТ ХҮСЬЕ!

Д.Мигаа

Эх сурвалж: ZONE.MN