Сүүлийн үед үзэгчдийн дунд хүлээлт үүсгээд байгаа гэр бүл, тэр дундаа эмэгтэйчүүдийн хүчирхийллийн тухай “Ларьдма” киноны гол дүрийг бүтээсэн жүжигчин Д.Пүрэвсүрэнг сайтынхаа зочноор урилаа. Түүний хувийн амьдралд ч бас хүчирхийлэл байсан гэх яриа олны дунд яригддаг. Ингээд Монголын сайхан бүсгүйчүүдийн нэг топ модель, жүжигчин Д.Пүрэвсүрэнгийн ярианд анхаарлаа хандуулна уу.

-Сүүлийн үед их шуугиан тариад байгаа “Ларьдма” киноноос яриагаа эхлэх үү?

-Энэ кино маань  Д.Төрмөнхийн зохиол.  Найруулагч нь    Ж.Сэнгэдорж. Жүжигчин Баттүшиг, Навчаа, Гэрэлсүх, Аминзул, миний бие тоглосоноо гадна  “Black zebra” продакшн операторын багаар  ажилласан.  Манай киноны нийт уран бүтээлчид 40-50 хүний бүрэлдэхүүнтэй, нэлээн олон кинонд ажилласан туршлагатай баг байгаа.   

-Зураг авалт хэр удаан хугацаанд үргэлжлэв?

-Яг нэг сар болсон. 2-р сарын 25-наас зураг авалт эхлээд хотоос гадна хорих анги гэх мэт онцгой объектуудаар зураг авсан. Киноны баг маань уртын төлөвлөгөөгөө өдөр өдөрт нь гаргаж төлөвлөгөөний дагуу сценүүдээ аваад өглөө долоон цагт цуглах гэх мэтээр цаг барьж, нарийн дэс дараа, эмх журамтай ажилласан болохоор богино хугацаанд хийж дуусгасан.

-Кино хэзээ нээлтээ хийх вэ?

-5-р сарын 5-нд нээлтээ хийж Тэнгис, Өргөө, Соёмбо кино театруудаар гарч эхэлнэ.

- “Ларьдма” гээд киноны нэрийг  хүмүүс  их сонирхож байгаа юм билээ?

-Зохиолч  маань гол дүрийн эмэгтэйн нэрээр нэрлэсэн. Нөгөө талаар киноны нэрийг сайн ажиглавал нэгэн утга санааг илэрхийлж байгаа.  Тэрийг үзэгчид маань өөрсдөө сайн анзаарвал мэдэгдэх юм.

- Энэ киног “Бодлын хулгайч” шиг  олныг шуугиулсан кино болох байх гэсэн хүлээлт үзэгчдэд үүсээд байгаа?

-Манай кино группынхэн бүтээлдээ маш сэтгэл хангалуун, чин сэтгэлээсээ дор бүрнээ өөрсдийн чадах зүйлээ цаг алдалгүй хийж чадсан гэдэгтээ итгэлтэй байгаа.  

-Киноны  зураг авалтад 17 саяын үнэтэй Мустанг  машин шатаасан гэсэн. Энэ үнэн үү?

-Машин авсан. Кино эхлэхээс авахуулаад дуусан дуустлаа тэр машин гарч байгаад эцэст нь дэлбэрдэг.

-Дуучин Т.Ариунаагийн машин гэж ярих юм билээ?

- Ариунаа эгч өмнө нь унаж байгаад зарсан машин.

- Таны тоглосон хэд дэх кино вэ? Урын сандаа хэчнээн уран бүтээлтэй болоод байна вэ?

-Дэлгэцийн бүтээл гэвэл долоо дахь кино маань.  Би 30 гаруй клипэнд тоглосон. 1998 онд наймдугаар ангийн сурагч байхдаа  “Арван жилийн дурсамж” гээд дууны  клипэнд анх удаа тоглож байлаа.  Мөн долоон жүжигт тоглосон.

-Жүжигчин Навчаа эмэгтэйчүүдийн  хүчирхийллийн эсрэг энэ киног бүтээх санааг гаргасан гэсэн. Таны хувьд өөрийн санаа оноогоо нэмж оруулсан уу?

-Навчаа эгч продюссераар ажилласан учраас баг бүрдүүлэлтийг гардаж хийсэн. Надад санал тавьж  зохиолоо уншиж үзээд хэлэх гэсэн санаа нь маш их таалагдаж тоглохоор болсон. Гэртээ удаан суусан учраас ажлаа хийгээгүй удчихсан,  ажилдаа хурдан орохыг  хүссэн үе таарсан байсан .

-“Ларьдма”  хүчирхийллийн эсрэг кино. Бодит амьдрал дээр гардаг хүчирхийллийн тухай та  ямар бодолтой явдаг вэ?

-Нийгэмд байгаа хүчирхийлэл  дээд доод аль ч түвшинд нүдний өмнө ил гарч байдаг. Оройн ТВ-ийн мэдээ, мэдээллийн сайтуудаар, хөрш айлд ч хүчирхийлэл гарч байдаг. Эмэгтэйчүүд хүчирхийллийн эсрэг тэр бүр тэмцээд байж чаддаггүй. Яаж дуу хоолойгоо нэгтгэж чадах вэ гэхээр уран бүтээлээрээ дамжуулж хэлэх гэсэн санаагаа үзэгчдэд ойлгуулж чадвал нийгэмд бяцхан ч гэсэн хувь нэмрээ оруулж байгаа юм болов уу гэж бодож байна.    

- Амьдрал дээр эмэгтэйчүүд бие биедээ багагүй зөвлөгөө өгдөг.  Найз тань нөхөртөө зодуулчихаад  ирвэл та найздаа  юу гэж зөвлөх вэ?

-Яг ийм явдалтай тулгарч байгаагүй болохоор мэдэхгүй байна. Мэдээж найзыгаа өмөөрнө. Хүмүүс эрэгтэй хүнийг эхнэртээ нэг гар хүрсэн л бол дахин гар хүрнэ гэж ярьдаг. Хүчирхийлэгч  хүчирхийлэгчээрээ л үлдэнэ. Хэзээ ч засрахгүй гэж бодож байна.

- Энэ киног таны бодит амьдралаас сэдэвлэн бүтээсэн гэсэн  яриа гарсан байна лээ?

-Навчаа эгч бид хоёрын амьдралаас сэдэвлэсэн гэснийг сонссон. Бид хоёрын амьдралаас сэдэвлээгүй. Бодит амьдралаас сэдэвлэхийн хувьд  түүхэнд томоохон бодит ул мөрөө үлдээсэн, эсвэл гайхамшигтай нээлт хийсэн хүмүүсийн амьдралыг сэдэвлэж кино хийдэг.

-Жүжигчин Навчаа миний амьдралын тодорхой нэг хэсэг орсон гэсэн байсан?

-Хүчирхийлэлд өртөж байсан уу гэвэл энэ бол тусдаа өөр асуудал. Түүнээс бид хоёрын амьдралаас сэдэвлэж бүтээсэн кино биш гэдгийг хэлмээр байна. Тодорхой хэмжээгээр хүчирхийлэлд өртөж байсан уу гэвэл тийм. 

- Таныг  өмнө нь хамт амьдарч Цэгцбаатарт их зодуулдаг, бүр хэвтэрт ортлоо зодуулж байсан гэж сонссон?

-Хүчирхийлэлд өртөж байсан. Үүнийг үгүйсгэхгүй.

-Ийм сайхан эмэгтэйд яаж гар хүрч чадсан юм бол оо гэж өөрийн эрхгүй бодогдож байна.  Ямар шалтгаанаар зоддог байсан юм бэ?

-Тэр талаар дэлгэрэнгүй тайлбар хиймээргүй байна. Би одоо сайхан амьдралтай болсон учраас өнгөрсөн явдлыг сөхмөөргүй байна.

-Та аз жаргалтай эмэгтэй мөн үү?

-Тэгэлгүй яахав.

-Сайн дураараа хүчирхийлэлд өртөх зам руу орчихдог эмэгтэйчүүд бас  байна.  Мөнгөнд нь  шунаж баян хүний эхнэр болчихдог. Гэтэл  нөхөр нь найз нөхөдтэй нь уулзуулдаггүй, гэрээс гаргадаггүй тохиолдол бий. Энэ бол гар хүрэхгүй ч гэсэн эрх чөлөөг нь боомилсон хүчирхийллийн нэг хэлбэр?

-Манайхан дунджаас дээш орлоготой хүнтэй суух юм бол мөнгөнд нь болсон гэж ярьдаг. Баян ядуу, дундаж амьдралтай хүнд ч сэтгэл зүрх гэж бий. Баян хүн ч тэр, эхнэр нь тэр харилцан дурлалцаж байж л эхнэр нөхөр болж амьдралаа холбодог юм болов уу гэж бодож байна. Үнэхээр мөнгөнд шунаснаар хүчирхийлэлд өртөж байгаа бол өөрийнх нь хохь гэж хэлмээр байна.

-Энэ кинонд тоглож байх үед хуучны эвгүй дурсамж сэдрэх  юм уу?

-Зохиолоо уншаад ерөнхий хар зургаа нүдэндээ буулгадаг. Тэр мөчид нээрээ ч ингэдэг дээ ч гэдэг юм уу тийм зүйл санагдаж байсан. Тоглох явцад хүндрэлтэй зүйлүүд гарсан. Кино урлаг бол аливаа зүйлийг бодитойгоор үзүүлдэг урлаг. Гэрэлсүх ах ийш тийшээ хүчтэй угзчиж татахад маргааш нь гарын хурууны ором гарчихсан байсан. Найруулагч нар болон портнёртойгоо сайн ажиллаж чадсаны үндсэн дээр дүрээ сайн гаргаж чадсан болов уу гэж бодож байна. Манай операторын баг өмнө нь хийгдэж байгаагүй сонин сонин өнцгөөс, шинэлэг техник тоног төхөөрөмжөөр гоёор кино зургийг авсан.

-Ер нь хүчирхийлэл бол эрэгтэй эмэгтэй хүмүүсийн харилцаанаас үүдэлтэй асуудал шүү дээ. Ямар эрэгтэй хүн хүчирхийлэл үйлдээд байдаг юм бол оо?  Та ямар  эр хүнд дургүй вэ?

-Кино зохиолоо уншаад хүчирхийллийн эсрэг төвтэй хамтарч ажилласан. Тэнд хүчирхийлэлд өртсөн эмэгтэйчүүдийн хэргүүдтэй танилцсан юм. Хүчирхийлэлд өртөхөөр нэг бол амь насаа алддаг, эсвэл амиа хорлодог, маш цөөхөн хувь нь нөхрөөсөө салаад сайн сайхан амьдалд хөл тавьдаг юм билээ. Эмэгтэй хүн хүчин мөхөс учраас согтуу эсвэл унтаж байх үед нь өөрийгөө болон хүүхдээ аврахын тулд нөхрийнхөө амийг хөнөөдөг юм байна. Эмэгтэйчүүдийн хорих ангид очиж кино зураг авахад 70-80 хувь нь хүчирхийллээс өөрийгөө хамгаалахын тулд хэрэг хийж ял эдэлж байгаа хүмүүс байсан. Манайд гэр бүл хүчирхийллийн хууль байдаггүй. Хүний амь хөнөөсөн болохоор өөрөө эргээд буруудаж ял эдлэх л хуультай. Уг нь овоо босгоогүй бол шаазгай суухгүй. Гэхдээ хууль журмынхаа дагуу л ял эдлэхээс өөр аргагүй болдог. Хэргүүдтэй танилцах явцад үнэхээр аймшигтай санагдаж байсан. Дийлэнх нь гаднаас нь харахад төлөв томоотой их сайхан хүн байдаг. Найз нараас нь мэдүүлэг авахад тусархуу, тэрэн шиг сайн хүн байхгүй гэх мэтээр мэдүүлж. Гэтэл гэртээ болохоор хүчирхийлэгч байдаг. Зарим хүн хайр нь хэт ихдэхээрээ хардаж улмаар тэр нь солиорол болж хүчирхийлэл үйлддэг. Бидний мэдэхгүй орчинд ч бас хүчирхийлэл байгаа.

-Та хүчирхийллийн эсрэг кинонд гол дүрд  тоглолоо. Өөрийн биеэр ч зах зухаас нь амссан. Яг өнөөдөр хүчирхийлэлд автаад байгаа эмэгтэйчүүдэд хандаж өөрийн зүгээс юу гэж хэлмээр байна?

-Эмэгтэй хүн нөхрөөсөө салаад явчихъя гэхээр дунд нь хүүхэд өнчрөх гээд байдаг. Өнөөдрийг хүртэл би байтугай надаас дээдэх нь шийдэж чадаагүй асуудал учраас яг тэг ингэ гэж зөвлөж чадахгүй нь.

- Та хэдэн онд анхны хүүхдээ төрүүлсэн  бэ? Хоёр хүүхдийн ээж болсон  гэхэд тун  залуухан сайхан  харагдаж байна?

-Манай охин өнгөрсөн дөрөвдүгээр сард арван нас хүрсэн. Би том охиноо 19-тэй төрүүлсэн.

-Бага нь хэдэн сартай вэ? Кинонд тоглож байхдаа хүүхдээ асрагчаар харуулсан уу?

-Бага охин маань есөн сартай. Намайг тэдэн давхар хауст амьдардаг, гэрийн үйлчлэгчтэй гээд л хүссэнээрээ бичдэг. Харин би орон сууцанд амьдардаг. Хүүгээ харахад төрсөн эгч маань тусалдаг учраас эгчдээ хүүгээ үлдээгээд арай тайван кино зургандаа явж байлаа. Том охиныг бага байхад ээж маань харж өгч тусалдаг байсан.

-Ингээд уран бүтээлийнхээ ажилд эргээд орчихож байгаа хэрэг үү? Ажлаа хийхийн хажуугаар ар гэр, үр хүүхдүүддээ анхаарал халамж тавих цаг хэр гарах бол?

- Урлагийн хүн бүтэн сар өдөр шөнөгүй зураг авалтанд явж зургаа дуусгана. Зураг дуусаад монтажны ажил эхлэхэд жүжигчид заавал тогтсон цагт  очих шаардлагагүй. Үүрэгт ажлаа хийж дуусгаад бусад үед амардаг.

-Гэр бүлийн аз жаргалын үнэ цэнэ юунд оршдог  гэж та ойлгодог вэ?

- Гэр бүлийн аз жаргал хамтдаа байх юм болов уу гэж боддог. Нэгийгээ эзгүйд хүлээх  хэцүү.

Өмнө нь бусад гэр бүлд өдөр тутам болдог зүйлийг ганц бие байхдаа мөрөөддөг байсан. Нөхөртэйгөө хамт супермаркет орж хүнсээ цуглуулах юмсан, хүүхдээ гадаа салхилуулах яваа аавыг хараад “Ямар гоё юм бэ. Би ийм юмыг өөрийнхөө амьдралд бий болгож харах юмсан” гэх мэтээр өөрт байхгүй юмаа мөрөөддөг байсан. Харин өнөөдөр би гэр бүлтэйгээ хамт байгаа маань аз жаргал.

-Өмнө нь гэр бүлтэй байхад энэ бүхэн  байгаагүй юм уу?

-Их сургуулиа төгсөөд найман жил болох гэж байна. Сургуулиа төгсөх үедээ охиныхоо ааваас салсан. Энэ хугацаанд эхнэр нөхрийн амьдралаас ангид байлаа шүү дээ.

-Охиныхоо ааваас салахаас өмнөх үед тань ч бас  саяны таны ярьсан шиг халуун дулаан орчин байгаагүй юм аа даа?

-Мэдээж байлгүй яахав. Гэхдээ өнгөрсөн асуудлыг ярих шаардлага надад байхгүй.

-Та бол авьяаслаг жүжигчний зэрэгцээ гоо сайхны илэрхийлэл гэж ихэнх хүмүүс хардаг. Эмэгтэйчүүддээ  гоо сайхны хамгийн энгийн зөвлөгөөг хүргэвэл? Гоё байхын үндэс нь юу байдаг юм бол оо?

-Өөртөө итгэлтэй байж толинд харахдаа эмэгтэй хүн дандаа инээмсэглэж байх хэрэгтэй. Дотроосоо гэрэлтэнэ гэдэг нь гоо сайхны эхний алхам юм уу даа. Инээж байгаа хүнийг хэн ч өөчилж муулахгүй байх. Инээмсэглэл гэдэг бол гол гоо сайхан. Харин сайхан байхын тухайд арчилгаа шаардагддаг.

- Төрсний дараа жинд нь өөрчлөлт орсон бүсгүйчүүд бишгүй бий.  Таны хувьд яаж жингээ барьсан бэ?

-Би яг л бусад эмэгтэйчүүдийн адилаар 16-17 кг нэмж төрсөн. Төрөхөөс гарахад өмд маань дээшээ гүйцэд татагдахгүй байсан /инээв/. Миний нормаль жин 56 кг. Төрөхөөс өмнөхөн 74 кг болсон. Эмнэлгээс гармагцаа гэдэсний даруулга байнга зүүсэн. Хүндрэлгүй төрсөн болохоор арваад хоногоос эхлээд бага багаар гэдэсний таталтын дасгал хийж бас гэртээ дугуй жийдэг байлаа. Одоо йогоор хичээллэж байгаа.

-Чөлөөт цагаа яаж өнгөрөөдөг вэ?  Жаахан хүүхэдтэй болохоор  цаг зав жаахан хомс байна уу?

-Нялх хүүхэдтэй болохоор өглөө босоод л энэ тэр юм хийсээр  зав хомс болчихдог юм байна. Том охинтойгоо байхад хоёулаа гадуур хамт явж, кино үзэж, саунд суудаг байсан. Багыгаа төрүүлээд ихэвчлэн гэртээ. Хоол унд хийх, супермаркет орох, бантан хийх, нухашийг нь зуураад хүүхэддээ өгөх  гээд л өдөр хоног хурдан өнгөрч байгаа.

-Гэр бүлийн хүнээ танилцуулахгүй юу?

-Нөхрийг маань Ганбаяр гэдэг. Нэг компанид ажилладаг. Олны танил биш, энгийн нэг залуу бий.

-Эр хүний тэр тусмаа нөхрийн тань ямар зан  чанар таалагддаг вэ?

-Манай хүн их ухаалаг. Эмэгтэй хүн л болсон хойно юмыг өнгөцхөн дөрөв тавхан өнцгөөс нь хараад дүгнэдэг. Гэтэл нөхөр маань найм есөн өнцгөөс нь харчихсан байдаг. Эрэгтэй хүнийг холын хараатай, эмэгтэй хүнийг арай ойр тойрогт байдаг гэдэг. Хөгжилтэй, тэвчээртэй гээд ер нь л их мундаг хүн, олон сайхан чанар нь таалагддаг.

Нөхрөөсөө авч байсан хамгийн гоё бэлэг?

-Манай охин.

-Хамгийн үнэтэй авсан ээмэг зүүлт ч юм уу ер нь топ моделийн кошлоконд юу байдаг бол гэж эмэгтэйчүүд маань сонирхож байж мэдэх юм?

-Надад тийм юм байгаа гэдэг ч юм уу би иймэрхүү юманд дургүй. Надад үнэтэй юм хэн нэгэнд үнэгүй, эсвэл хэн нэгэнд хэзээ ч олдохгүй гэж бодохоор үнэтэй ч юм шиг санагддаг. Энэ бол харьцангуй ойлголт. Бодит юмны үнийн тухайд ярих үнэхээр дургүй.

- Хэдийгээр олны танил ч адилхан л хүн. Автобусанд сууж үзсэн үү?

-Оюутан болоод жолоо төгсөөд машинтай болсон болохоор автобусанд  нэг их суугаагүй. 

-Мөрөөдлийг тань асуухгүй өнгөрч боломгүй санагдлаа?

-Манай нөхөр бид хоёрын мөрөөдөл ижилхэн. Эцсийн эцэст хүний амьдралд гэр бүл  хамгийн чухал. Ажил гэж явсаар, эсвэл хамгийн чухал нь карьер гээд түүнийгээ хөөж явсаар хүүхэдтэй болох цаг нь өнгөрчихсөн, нөхөрт гаралгүй оройтчихлоо гэдэг хүмүүс бий. Миний хувьд загварын чиглэлээр тодорхой хэмжээнд мөрөөдлөө биелүүлсэн. Одоо миний мөрөөдөл бол гэр бүлтэйгээ хамт байх.

-Таны амьдралын хамгийн сайхан мөч. Одоо л би жаргалтай байна даа гэж бодож байсан тэр сайхан мөчөө бидэнтэй хуваалцаач?

-Охиныхоо аавд дурлах үедээ өөрийн эрхгүй их аз жаргалтай байсан. Ганцаараа байхдаа инээмээр санагдаад л. Яруу найрагч биш ч гэсэн дөрвөн мөрт санаанд ороод л, нэг л тийм хөнгөхөн сайхан мэдрэмж төрж байсан.

-Дурласан  мөчдөө зан чанарт тань багагүй өөрчлөлт гардаг юм аа даа?

-Дурлахаараа гээд ярихаар дандаа дурладаг хүн шиг болчих байх /инээв/. Дурлал гэдэг их сайхан зүйл учраас дотроос баяр баясал төрөөд хүнийг аз жаргалтай гэгээлэг болгодог. Хүн дурлахаараа ямар ч харын сэтгэл төрөхгүй харин тэр минь их сайхан, тэр маань юу хийж байгаа бол гэсэн эерэг энергиэр ханддаг юм байна.

-Та хоёрын дурлал одоо хайр  халамж болчихсон уу?

-Ингээд ярихаар дэндүү дотоод асуудал руугаа орох гээд байна. Би ер нь хувийнхаа амьдралыг тоочих дургүй.

Амьдралд жаргал зовлон ээлжилж байдаг. Таны амьдралын гунигтай үе?

-Би эцэг эхээс тавуулаа, хоёр ах, хоёр эгчтэй. Нэг ах, нэг эгчийгээ алдсан. Гэр бүлийн гишүүд өнгөрнө гэдэг  маш том гарз. Түүнээс би амьдралдаа  алдчихлаа энэ тэр гэж харамсдаггүй. Сэтгэлээр ч  нэг их унаад байдаггүй. Өнгөрсөн амьдралдаа ч харамсдаггүй. Юмыг хурдан мартаж чаддаг. Хүнд гомдсоноо эргүүлж бодож шанална гэдэг бол сайн дураараа өөрийгөө зовоож буй үйлдэл. Гомдоосон хүн нь мартчихсан байхад тэр намайг тэгж гомдоосон доо гэж бодох тусам л өөрийгөө зовоож байна гэсэн үг. Миний философи бол сэтгэлээр унаад байдаггүй, аливаа зүйлийг гэрэл гэгээтэйгээр хардаг.

-Зарим эмэгтэйчүүд  гомдсон гомдлоо  дахин дахин эргүүлж бодоод мартаж чаддаггүй. Магадгүй танд  өөртөө итгэлтэй, өөрийгөө эрч хүчтэй байлгах дасгал  байж болох юм?

-Тухайн хүний л сэтгэлзүйн онцлог байдаг байх. Би тийм дасгал хийдэггүй ээ.

-Загвар өмсөх, жүжиглэхээс гадна нууцлаг авьяас бий юу?

-Нууцлаг авьяас байхгүй.

-Охидынхоо талаар яривал?

-Манай том охин ном унших их дуртай. Одоо дөрөвдүгээр ангиа төгсөнө. Тусад орчихсон охинтой байх үнэхээр сайхан. Намайг хоол хийж байх үед дүүгээ саатуулна, дүүдээ их хайртай.

-Олны танил, бас сайхан бүсгүй  байхын сайхан ба саар тал?

-Хүн л болсон хойно интернэт орно, сэтгэгдэл уншиж сөрөг муухай юм уншаад жихүүцнэ. Олны танил гэхээр л ямар ч зүрх сэтгэлгүй хүн биш шүү дээ.

 Би төдийлөн олон хүнтэй харьцаад байдаггүй. Гэр бүлийн хүрээний цөөхөн найзтай. Харьцах хүрээ багатай болохоор надад өөрийнхөө тухай хов жив сонсох нь бага байдаг. Олон найзтай жишээлбэл сэтгүүлч найзтай байлаа гэж бодъё. Тэр чамайг тэгээд биччихсэн байна лээ гээд утасдаад  байн байн хэлээд байвал  сэтгэлзүйн байдлыг эвдээд байвал онцгүй байх. Тийм болохоор үнэхээр хэцүү зүйлийг нэг их мэдэрдэггүй. Би мэргэжлээсээ шалтгаалаад олны танил болчихсон болохоор үүний сайхан муухайд ач холбогдол өгөөд байдаггүй. Гол нь би өөрөө энгийн байдаг.

- Таны талаар  хэвлэл мэдээллээс уншихад ихэвчлэн “Арван жилийн сурагч байхдаа алтны магнатын эхнэр болж олонд танигдсан” гэсэн өмнөтгөлөөр эхэлдэг. Үүнийг уншихад өөрт тань ямар сэтгэгдэл төрдөг талаар асуумаар санагдлаа?

-Уншиж байгаа би залхаж байхад бичиж байгаа сэтгүүлчид нь ямар залхдаггүй юм бэ гэж боддог. Сэтгүүлчдэдээ хандаж “Энэ чинь моодноос гарчихсан та нар яасан уйддаггүй юм бэ” гэж хэлмээр байна. Тэрний оронд гадуур болж байгаа олон сайхан зүйлсийн тухай бичээсэй гэж хүсч байна. Аз жаргалтай сайхан амьдарч байгааг минь  одоогийнх нь байдлаар хүлээж аваасай гэж хүсдэг. Манайхан хуучин улиг болсон зүйлээ л бичээд байдаг. Ингэхээр чинь яаж хөгжих юм бэ.   

- Уран бүтээлч хүний  хамгийн сайхан нь юундаа байдаг  бол?

-Уран бүтээлээ олны хүртээл болгож үзэгчдэд хүргэх үедээ хамгийн их кайф авдаг.

-Нөхөр тань  мэргэжлээрээ ажиллахад  хэр дэмждэг вэ?

-Үгүй ээ. Харин ч их дэмждэг. Тийм ч учраас ажилдаа эрт буцаж орсон.

-Авьяаслаг эмэгтэйчүүдийн нөхөр нь мэргэжлээрээ ажиллахад дургүй байдгаас гэр бүл салж байсан тохиолдол цөөнгүй  бий. Энэ талаар таны бодол?

-Ер нь ганц урлагийнх ч биш янз бүрийн салбарт ажилладаг эмэгтэйчүүдийг ажил хийх эрхийг нь хааж боосноор гэртээ суудаг бүсгүйчүүд байдаг юм шиг байна лээ. 

-Илэн далангүй ярилцсанд баярлалаа. Танд, таны гэр бүлд аз жаргал хүсье.  

 Ярилцсан Г.Оюун /WWW.ZONE.MN/