Ерөнхийлөгчийн сонгуулийн бага сунгаа дуусч, их сунгаа эхэллээ. Их сунгаанд МАН-аас Б.Бат-Эрдэнэ, Д.Оюунхорол, Ө.Энхтүвшин нар үлджээ. Тус намын бага хурал ирэх сарын 4-нд хуралдаж хэнийг уралдуулахаа шийднэ. Энэ үеэр танхимаас С.Баярыг дэвшүүлэхээр зэхэж байгаа гэх мэдээлэл байна. Тэр ч байтугай намаасаа дэмжлэг авч чадвал ямар тоглолт хийхээ С.Баяр төлөвлөчихсөн сурагтай. “Би дахиж улс төрд оролцохгүй” гэж саяхан ярилцлага өгсөн нь намынхандаа хандаж хэлсэн үг байжээ. Түүнийг шахаад байсан учраас бусдыгаа тайвшруулахын тулд ингэж мэдэгдсэн бололтой. 

Энэ эрхэм 25 дахь Ерөнхий сайдыг хийж байхдаа нэр хүндтэй байлаа. Харин эрүүл мэндийн шалтгаанаар улс төрөөс гарснаас хойш “Оюутолгойн гэрээг байгуулахдаа авлига авсан” гэх хардлагын бай болж өдгөө нэр хүнд нь багагүй унаад буй тул  намдаа дэмжлэг аваагүй гэх.

Ийнхүү намынхаа дэмжлэгийг авч чадаагүй ч түүнд Ерөнхийлөгч болох хүсэл байгаа бололтой. Тиймгүй бол улсын хэмжээний томоохон хэвлэлд ярилцлага өгч, ховор содон зурагнуудаа сошл орчинд тарааж суух нь юу л бол.  Тэр онцын шаардлагагүй бол багынхаа дурсамжийг олны өмнө ярьж, ховор зурагнуудаа бусдад алдах хүн биш. Ийм ноён нуруутай учраас улс төрчийн хувьд сайн тоглогч гэж үнэлэгддэг биз.

Тэр нэр дэвшвэл Ц.Элбэгдоржтой эн тэнцүүхэн өрсөлдөнө үү гэхээс сахлынх нь будаа болоод өнгөрөхгүй. Ядаж л Д.Оюунхорол шиг ганцхан Завханд танигдсан ледир биш. Ө.Энхтүвшин шиг яах гээд байгаа нь мэдэгдэхгүй дүлэгнэх хүн ч биш. Харин Б.Бат-Эрдэнэ аваргын хажууд нэр хүнд муутай байх. Өдгөө аварга маань С.Баярын гадныханд найр тавьж өгсөн гээд байгаа Оюутолгойн гэрээг залруулахаар зүтгэж явна. Гэхдээ “Орос Баяр” улс төрийн тоглолт, боловсрол, олон улсын харилцааны асуудлаар “Баагий Аварга”-ыг хаанаа ч хүргэхгүй.

Ямартай ч МАН С.Баярыг танхимаас дэвшүүлээд Ерөнхийлөгчид сойвол ононо уу гэхээс алдахгүй. Ц.Элбэгдоржийн эмзэг цэгийг яаж олж хатгахаа Санжийн хүү мэднэ гайгүй. Түүнийг ялалт байгуулахад “Эх ороноо худалдсан” гэх хаяг нь саад болох байх даа.

Сэтгүүлч: С.ДОРЖ

Эх сурвалж: WWW.ZONE.MN