АОХН-ийн сайд нарын долоодугаар бага чуулган манай улсад үргэлжилж байна. Энэхүү том чуулганд улс орныхоо нэрийг авч гарахын тулд төрийн удирдлагуудаас эхлээд жирийн иргэд эрвийх дэрвийхээр оролцож байгаа. Дөрөв хоног машины дугаарт хязгаарлалт хийхэд нь юу ч хэлсэнгүй. Түүгээр зогсохгүй орон гэргүй хүмүүсээ гадны зочдоос нуухад нь бид шүд зуув. Энэ бол бидний улс орныхоо төлөө гаргаж байгаа тэвчээр юм. 

Хүний өмнө муугаа үзүүлэхгүйн тулд сүүлийн долоо хоногт Улаанбаатар хотод тохижилтын ажлууд хийгдэж, төв талбайгаа гялалзтал угаасан билээ. Гэтэл тэр цэвэрхэн талбай дээр өнөө өглөө нэгэн шившигт үйл явдал боллоо. Тодруулбал, МАХН-ын хэсэг нөхөд гадны олон төлөөлөгчдийн өмнө элдэв лоозон барин жагсаж монголчуудын нэр нүүрийг гутаав. Энэ жагсаал зөвхөн төв талбай дээр үргэлжилсэнгүй. Монголын хүүхдийн ордон, Кемпински зочид буудлын гадаа бас болжээ.  

Тэд “Монгол Улс улс төрийн хоригдолтой”, “Монгол ардчилалгүй орон”, “Улс төр шүүх засаглалд нөлөөлж байна” гэх мэт лоозон барьсан байх юм. Тэдний лоозонг харж гайхсан төлөөлөгчид учрыг нь лавлавал “Манай намын даргыг улс төрийн зорилгоор хорьсон” гэх тайлбар хийв. Нэгэнт буруутай нь тогтоогдоод ял эдэлж байгаа хүний төлөө ингэж авирлах нь хэр зохистой вэ. Н.Энхбаярыг наранд гаргахын тулд улс орны нэр хүндийг унагах ёстой юм гэж үү?   

Жагсаал цуглаан нь нэг талаараа Монголыг ардчилалтай улс гэдгийг харуулж байгаа боловч үндэслэлтэй асуудлаар жагсах хэрэгтэй. Цагтаа төрийн тэргүүн явсан хүн гэхэд Н.Энхбаяр арай л улс төрийн соёлгүй үйлдэл гаргалаа.

Сэтгүүлч: С.ДОРЖ

Эх сурвалж: WWW.ZONE.MN