Сар шинийн баярын өмнө “Монгол кино” нэгтгэлийн захирал Ж.Солонго Монгол Улсын Соёлын Тэргүүний ажилтан цол тэмдгээр дөрвөн хүнийг шагнахаар болсон байна. Гэвч баяр давхацсан учраас цол тэмдгийг сар шинийн дараа өгөхөөр болж хойшлуулжээ. Харин шагнуулсан хүмүүс саяхан цол тэмдгээ авахаар ССАЖЯ-нд очтол Ж.Солонго захирлын гардуулахаар үлдээсэн үнэмлэх хуурамч байсан гэх.  

Хуурамч үнэмлэхийг хэвлэсэн цаас, сайдын гарын үсэг, бичиглэл зэрэг асуудалтайгаас гадна  сайдын тушаал, үнэмлэхийн дугаараар нь шүүж үзэхэд өмнөх сайдын үед ч бүртгэгдээгүй байсан аж. Тиймээс энэ асуудлыг цагдаагийн байгууллагаар шалгуулахаар болж, цол тэмдгийг нь хаанаас авсныг нь тогтоохоор болсон байна.

Түүнчлэн Ж.Солонгыг “Монгол кино” нэгтгэлийн эзэмшил газрыг барилгын компаниудтай хуйвалдан наймаалцсан мөн тус үйлдвэрийн санхүүжилтын мөнгийг хувьдаа завшсан,  “Түүхийн хүрд” кино мэдээг муу бэлтгэсэн төдийгүй  СТА цол, тэмдгийг хуурамчаар үйлдсэн гэж “Монгол кино нэгтгэл”-ийн ахмадын хорооныхон буруутгаж Авлигатай тэмцэх газарт шалгуулж байгаа   юм байна.  

Харин Ж.Солонго захирлын хувьд энэ бүхнийг захиалгатай үйл ажиллагаа хэмээн үзэж байгаа аж. Тэрбээр  “СТА цолыг соёл урлагийн байгууллагад 15-20 жил ажилласан хүмүүст Засгийн газраас өгдөг. Бид өмнө нь 100 гаруй  хүнд СТА цол, тэмдэг өгсөн. Саяын СТА цол, тэмдгийг Д.Жигжид сангаас дөрөв, таван хүнд өгүүлэхээр бичиг баримтыг нь яам руу явуулсан. Долдугаар сард яамнаас яриад “Танай дөрвөн хүний СТА цол, тэмдэг гарсан” ирж аваарай гэсэн ч баяр ёслолоор өгөх гэж хадгалж байгаад сая ахмадын баяраар үнэмлэхийг нь өгсөн. Тэмдэг нь хараахан гараагүй байна гэж байсан. Заримдаа тэмдэг нь гардаггүй юм. Ер нь би сайдын гарын үсгийг хуурамчаар хийгээд яах юм. Яамны тамгыг хуурамчаар дарж болохгүй шүү дээ. Хэрвээ энэ цол тэмдэг нь хуурамч байдаг бол яамаар асуудлаа шийдвэрлүүлэх ёстой. Түүнээс биш яамнаас бидэнд ирсэн үнэмлэхийг хуурамчаар хийнэ гэж юу байхав. Ер нь ССАЖЯ-нд ажилладаг Баянзул гэх нөхөр байдаг. Тэр хүн миний араар хэл ам хийж яваад байгаа хэдэн хүмүүсийн ард байдаг. Үнэхээр буруу зүйл хийсэн бол цагдаагийн газарт шалгуулахыг хүсч байна” гэжээ.

Тэрбээр 1997 оноос хойш өнөөг хүртэл даргаар ажиллаж байгаа бөгөөд энэ хугацаанд   мэргэжлийн хяналт, цагдаа шүүхээс  17 удаа шалгаж  буруугүй нь тогтоогдсон юм байна.

Г.ЭНХТУЯА /WWW.ZONE.MN/