2017 оны 6 сарын 19
“Монголын тал нутаг” дэлхийн тайзыг уяраалаа

 

Их Британи, Умард Ирландын нэгдсэн вант улсын Уэлсийн нийслэл Кардиф хотноо Английн “BBC” телевизээс хоёр жил тутамд зохион байгуулдаг “BBC Cardiff Singer of the World” уралдаанд Чингис хаан одонт, МУГЖ Г.Ариунбаатар Романсын төрөлд тэргүүн байр эзэлсэн сайхан мэдээ өнгөрөгч амралтын өдрүүдэд сонор мялаав. Уг уралдааны эцсийн шалгаруулалтад Монголын хоёр дуучин үлдсэн мэдээлэл өнгөрөгч гуравдугаар сард цацагдаж байсан билээ.    

 

 

Уралдааны төгсгөлийн шатанд Г.Ариунбаатар гурван дуу дараалан дуулсан бөгөөд хамгийн төгсгөлд нь Урлагийн гавъяат зүтгэлтэн, Төрийн шагналт Б.Шаравын хөгжим, Урлагийн гавъяат зүтгэлтэн З.Түмэнжаргалын шүлэг "Монголын тал нутаг" дууг дуулсан нь монгол дуу дэлхийн сонгодог урлагийн том уралдаанд дуулагдсан анхны тохиолдол боллоо. Түүнийг энэ дуугаа толилуулсны дараа тус уралдааны зөвлөх  Мари Кинг нулимс дуслуулан, дуучны авъяас чадварыг шагшин магтсан юм. Ийнхүү МУГЖ Г.Ариунбаатар Монголын сонгодог бүтээлийг дэлхийн тайзнаа хүлээн зөвшөөрүүлж чадлаа. Манай дуучин “The Song Prize” төрөлд Америкийн Жон Чест, Шотландын Катриона Морисон, Украины Юрий Самойлов, Английн Луис Алдер нартай өрсөлджээ.

 

 

Г.Ариунбаатар СУИС-ийг Дуурийн дуулаач мэргэжлээр, профессор О.Ичинхорлоо багшийн удирдлага дор 2005-2010 онд суралцаж төгссөн бөгөөд М.И.Глинкийн нэрэмжит олон улсын дуулаачдын XXIV уралдааны I байр, Шилдэг баритон дуучны шагнал; Муслим Магомаевын нэрэмжит олон улсын дуурийн дуулаачдын III уралдааны I байр; Олон улсын дуулаачдын “Байгал” II уралдааны тэргүүн байрын шагнал; П.И.Чайковскийн нэрэмжит олон улсын мэргэжлийн дуурийн дуулаачдын XV уралдааны I байр, Гран при шагнал зэргийг тус тус хүртэж, мөн Английн хатан хааны ордонд урилгаар дуулсан дэлхийн зиндааны алдарт дуучин юм. Тэрээр ОХУ-ын Санкт-Петербург хотын Мариинский театр болон Буриадын Дуурь Бүжгийн Эрдмийн театрын гоцлол дуучнаар ажиллаж байна.

 

 

Г.Ариунбаатар өөрийн фэйсбүүк хуудастаа ийнхүү бичжээ: “BBC Cardiff  Singer of  the World-2017 тэмцээний Романсын төрөлд тэргүүн байр эзэллээ. Энэхүү финалыг миний дуулсан бүтээлүүдээс Б.Шарав багшийн “Монголын тал нутаг” дуугаар өндөрлүүллээ.  Дууны үг, аялгууг BBC телевизийн хөтлөгч шагшин магтаж, сэтгэл нь хөдлөн нулимс дуслуулж байхыг харах сайхан байлаа. Маргааш сүүлийн Финалтай! Хичээнэ ээ” хэмээн сэтгэгдлээ хуваалцжээ.

 

Ariunbaatar-The steppes of Mongolia

 

 

"Монголын Тал Нутаг" - (Юса) (Өвөр Монгол)

 

 

Шарав - "Монголын Тал Нутаг" (Цэвээндорж) (Түвд)

 

 

МУАЖ Долгор - "Монголын тал нутаг"

 

 

 

Д.Мигаа

Эх сурвалж: ZONE.MN

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...