2017 оны 6 сарын 17
Германыг нэгтгэсэн гавъяатан таалал төгсчээ

 

Германы Людвигсхафен-ам-Райн хотод “эв нэгдлийн канцлер” Хельмут Коль таалал төгссөн байна. Нэгдмэл Герман улсыг байгуулах, хүйтэн дайныг хазаарлах үйлсэд гарамгай хувь нэмэр оруулсан 87 настай алдарт улстөрч өөрийн гэртээ амьсгал хураасан аж.

 

“Европын болон дэлхийн улстөрийн нэгэн эцэг” таалал төгссөн явдалд Германы ард түмэнд ОХУ-ын Ерөнхийлөгч Владимир Путин гүн эмгэнэл илэрхийлсэн байна. Тэрээр энэхүү агуу немц эрийн цэцэн цэлмэг ухаан, алсын хараа, хүнд хэцүү нөхцөл байдалд гайхалтай ажилладаг чадвар зэргээр бахархдаг байснаа онцлон дурджээ.

 

 

ХБНГУ-ын канцлер Ангела Меркель талийгаач Хельмут Колийн гэгээн дурсгалыг хүндэтгэн мэхийн ёсолж буйгаа илэрхийлсэн байна. “Түүнийг таалал төгссөн гэдэгтэй эвлэрэхэд бидэнд тодорхой цаг хугацаа шаардагдаж байна” хэмээн тэрээр харамслаа илэрхийлээд, талийгаач бол “Герман орны амжилт” байсан юм гэжээ.

 

 

Германы Бундестагийн гадаад харилцааны зөвлөлийн гишүүн Хернот Эрлер энэхүү “агуу удирдагчийг” Германы ард түмэн үеийн үед үүрд мартахгүй хэмээн өгүүлээд, хуучнаар ЗХУ болон Михаил Горбачев байгаагүйсэн бол Берлиний хана тийм ч амар нурахгүй байсан гэж онцлон тэмдэглэсэн байна. 

 

Д.Мөрөн

Эх сурвалж: ZONE.MN

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...