2017 оны 1 сарын 11
Унтаа сайд – Утаатай ирээдүй

 

Өнөөдөр Төрийн ордонд Монгол улсын Ерөнхийлөгч Ц.Элбэгдорж утааны асуудлаар сэтгүүлчидтэй уулзалт хийсэн билээ. Уг уулзалтад ажил үүргийн чиг шугамын дагуу УИХ-ын гишүүн, БОНХАЖ-ын сайд Д.Оюунхорол, УИХ-ын гишүүн, УИХ-ын БОХХААБХ-ны дарга Ц.Гарамжав, УИХ-ын гишүүн Б.Батзориг, Монгол Улсын Ерөнхийлөгчийн Тамгын газрын дарга Ц.Баярсайхан, Ерөнхийлөгчийн зөвлөх О.Чулуунбилэг, ҮАБЗ-ийн Ажлын албаны дарга О.Очиржав нар оролцсон юм.

 

Нийслэл хотод амьдарч буй 1,3 сая иргэдийн эрүүл мэнд, амь насанд аюул учруулахуйц хэмжээнд хүрээд байгаа утааны асуудал эрх баригчдын нэн түрүүнд зайлшгүй анхаарах асуудлын нэг болоод байгаа. Тийм ч учраас өнөөдөр төрийн тэргүүн зориуд цаг зав гарган, энэ асуудлаар сэтгүүлчидтэй санал бодлоо солилцов.

 

Харин харамсалтай нь, Монгол төрийн нэгдүгээр эрхэм утааны асуудалд сэтгэлээ чилээн ярилцаж байхад хамгийн түрүүнд анхаарах ёстой Байгаль орчны сайд Д.Оюунхорол хээв нэг үл тоосон байдалтай, бараг л унтаж байх нь тэр!

Агаарын бохирдлын асуудалд хамгийн их анхаарлаа хандуулах үүрэг хариуцлага бүхий сайд нь ингэж хандаж байхад бид мөддөө утаанаас салах нь юу л бол... Түүнд ард иргэдийн эрүүл мэнд, утаа угаарын асуудал огт падгүй байх нь.

 

 

 

Бас саяхан Ерөнхий сайд Ж.Эрдэнэбат, Нийслэл хотын захирагч Су.Батболд нар утааны гамшигтай танилцах зорилгоор гадуур явж байхдаа бараг л Зайсан хавьд ч юм уу, харьцангуй утаа униаргүй газарт нь очиж байгаад малийтлаа баясан инээж байгаа зургаа сошл сүлжээгээр түгээн олны эгдүүцлийг төрүүлэв. Утаатай холбоотой асуудал яригдаж байгаа үед баясгалантайгаар инээж зогсоно гэдэг нэг л логик авцалдаагүй санагдахаар. Ер нь ч, утаа угаараас болоод ард иргэдийн бухимдал их байгаа энэ цаг үед тэднийг даапаалж байгаа мэт дүр зургийг түгээнэ гэдэг үнэн бодлогогүй пиар. Тэр эрхэм дарга нарын хэвлэл мэдээлэл, пиарыг хариуцдаг хүмүүс нь юугаа ч хийж байдаг юм!

 

Хотын дарга үнэхээр л сэтгэлтэй удирдагч юм бол утааны ид оргил цаг болох оройн 18-20 цаг орчимд Дэнжийн 1000, Баянхошууны гэр хорооллоор явж, ард иргэдийнхээ өнөөгийн нөхцөл байдалтай сайтар танилцах ёстой. Тэдгээр утааны голомтод Нийслэлийн удирдлагууд хурлаа хийгээд үзсэн ч юу нь болохгүй гэж. Саяхны тэр гадуур гарч айлаар хэссэн зураг нь л лав огт итгэл үнэмшил төрүүлэхээргүй харагдаад байна лээ. Бараг л социализмын үе шиг урьдчилж бэлдсэн айлуудаар ороод байгаа юм уу, хаашаа юм. Эсвэл Засгийн газар "Өлзий" зуухны рекламанд тоглоод байгаа юм уу гэлтэй.

 

 

Ямартай ч, Д.Оюунхорол сайдын биеэ авч яваа байдал, Ерөнхий сайд, Хотын мээр хоёрын хөгжил хөөртэй царай зүснээс харахад, утааны голомтод шаналж буй ард иргэддээ санаа зовж байгаа нь мэдрэгдэхгүй л байна даа. Сэтгэл дутаад байна, эрхэм дарга, сайд нар аа!

 

Д.Чингүн

Эх сурвалж: ZONE.MN
 

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...