2016 оны 6 сарын 7
Дамбын Одгэрэл: Монголын төр хувийн мөнгөө өсгөх гэсэн хэн нэгний тоглоом биш

УИХ-ын сонгуульд Хэнтий аймгийн 41 дүгээр тойрогт МУНН-аас нэр дэвшигч, Монголын нийгмийн сэтгэлзүйн хүрээлэнгийн захирал, Ph.D Д.Одгэрэл бидэнд хандлаа. Тэрээр зарим нэр дэвшигчтэй холбоотой ноцтой асуудлын талаар Сонгуулийн ерөнхий хороо өнөөг хүртэл ямар ч арга хэмжээ авахгүй байгаа нь Монгол Улсын Үндсэн хууль, Сонгуулийн тухай хууль, сонгогчдыг доромжилсон хэрэг хэмээн үзэж буйгаа хэлсэн юм.

Та энэ удаагийн УИХ-ын сонгуульд Хэнтий аймгийн 41 дүгээр тойрогт МУНН-аас нэр дэвшиж байгаа. Тэгэхээр хэн гэгч нэр дэвшигчтэй холбоотой асуудал ингэтэл тэсвэр тэвчээрийг тань алдагдуулав?

- Та бүхэн мэдэж байгаа. Сүүлийн хэд хоногийн турш хэвлэл мэдээллийн хэрэгслээр олон нийтэд хүрч байгаа нэг мэдээлэл бий. Одоогийн УИХ дахь АН-ын бүлгийн дарга, Хэнтий аймгийн 41 дүгээр тойрогт нэр дэвшиж байгаа Б.Гармгайбаатар гэж хүнтэй холбоотой юм. Энэ хүний 100 хувийн эзэмшлийн “Монроуд” гэж компани байдаг. Зам барьдаг компани. Хэнтийнхэн, ер нь монголчууд энэ компаниар нь сайн мэднэ. Зүүн аймгийнхан бүр илүү мэднэ дээ. Гэтэл энэ компани нь 2014 онд “Тэс петролиум” компаниас гэрээний дагуу хагас тэрбум төгрөгийн үнэ бүхий шатахуун авч хэрэглэчихээд өнөөдрийг хүртэл өгөөгүй юм байна.  Тодруулбал, Б.Гарамгайбаатар Завхан аймгийн Солонготын даваа, Халзанбүргэдэйн автозамын тендерийг энэ компанийнхаа нэрээр авч, улсаас төсөвлөсөн хөрөнгийг бүрэн авч үйл ажиллагаа явуулж байсан атлаа “Тэс петролиум” ХХК-аас авсан шатахууныхаа үнийг төлөлгүй, уг асуудал нь эцэстээ шүүхээр шийдвэрлэгдэн, шийдвэр гүйцэтгэлийн ажиллагаа явагдаж байгаа юм байна. Энэ талаараа “Тэс петролиум” ХХК-ийнхан 2016 оны тавдугаар сарын 30-нд Сонгуулийн ерөнхий хороонд хандсан байгаа юм.

Ингээд хариу өгөхгүй болохоор нь энэ сарын 2-ны өдөр дахин гомдол гаргажээ. Энэ гомдолдоо Б.Гарамгайбаатар нь Сонгуулийн тухай хуульд заасан шаардлагыг хангахгүй болох нь тодорхой болмогц өөрийн өмчлөлийн өртэй компаниа хүү Г.Тэнгисийн нээр дээр шилжүүлэх замаар өр төлбөргүй мэт дүр эсгэн, Монгол Улсын сонгууль, түүнийг зохион байгуулж байгаа төрийн байгууллага болох СЕХ-г, улмаар сонгогчдыг хууран мэхлэж, залилан нэрээ дэвшүүлэн бүртгүүлэх гэж байгаа тухай мэдээлжээ.

Харин өнөөдрийг хүртэл Сонгуулийн ерөнхий хороо ямар нэг арга хэмжээ авсангүй. Гэтэл өнөөдөр нэр дэвшигчдэд батламж гардуулах гэж байна.

УИХ-ын гишүүн Б.Гарамгайбаатарын өртэй гэдэг нь, Монроуд” компани 100 хувь түүний өмч гэдэг нь үнэн хэрэг үү?

- Б.Гарамгайбаатар “Монроуд” ХХК-ийг 100 хувь эзэмшдэг гэдгээ жил бүр АТГ-т мэдүүлсээр ирсэн байна. Бас “Монроуд” ХХК-иас 506 853 028.81 төгрөгийг гаргуулан “Тэс петролиум” ХХК-д олгуулах шийдвэрийг Баянгол, Хан-Уул, Сонгинохайрхан дүүргийн Иргэний хэргийн анхан шатны шүүхийн 2015 оны араванхоёрдугаар сарын 23-ны өдрийн 102/ШШ2016/00105 дугаар шийдвэр, Нийслэлийн Иргэний хэргийн давж заалдах шатны шүүхийн 2016 оны дөрөвдүгээр сарын 20-ны өдрийн 763 дугаар магадлалаар гаргажээ. Мөн шүүхийн дээрх шийдвэрийг албадан гүйцэтгүүлэхээр 2016 оны тавдугаар сарын 30-ны өдрийн 102/Ш32016/19037 дугаар захирамж, 2133 тоот Шүүхийн гүйцэтгэх хуудас бичигдсэн байна. Би баримттай л юм ярьж байна.

Нэгэнт өртэй нь тогтоогдож байгаа болохоор УИХ-д гэр дэвших эрхгүй гэсэн үг үү?

- Тийм ээ. Энэ нь Сонгуулийн тухай хуулийн 125.4-ийн 125.4.1 дэх хэсэгт заасан “нэр дэвшигч нь банк, бусад хуулийн этгээд, иргэнд шүүхийн шийдвэрээр тогтоогдсон төлбөл зохих зээл, барьцаа, батлан даалтын өргүй байх”, 125.4.3-т заасан “...нэр дэвшигч нь аль нэг компанийн 51 ба түүнээс дээш хувьцааг эзэмшдэг бол тухайн компани нь албан татварын хугацаа хэтэрсэн өр төлбөргүй байх” гэсэнтэй харшилж байгаа юм.

Та Б.Гарамгайбаатар гишүүнтэй нэг тойрогт өрсөлдөж байгаа юм байна. Тэгэхээр таны ингэж хэвлэлд хандаж байгаа чинь өрсөлдөгчөө замаасаа зайлуулах гэсэн оролдлого гэж харагдах юм биш үү?

-  Би тэр хүнтэй нэг тойрогт нэр дэвшиж байгаа нь үнэн. Гэхдээ үүнд өрсөлдөгчөө замаасаа зайлуулах гэхээс илүү маш том асуудал байгаа юм. Б.Гарамгайбаатар Хэнтийн зон олныг, сонгогчдыг доромжилж байна. Би Хэнтийн уугуул хүүхэд. Тэнд төрж өссөн, хүн болсон. Б.Гарамгайбаатарын энэ явдлыг би сонгуулийн нүдээр харахгүй байна. Та бүхнийг төлөөлье гэж санал гуйж очиж байгаа юм бол бүгдийг хуулийн дагуу хий. Бас хүн шиг бай гэж хэлмээр байна. Би анх удаа сонгуульд нэр дэвшиж байгаа хүн биш. Улс төрийн өрсөлдөөн, үүний цаана нутаг орноо гэсэн сэтгэл ямар байх ёстой вэ гэдгийг сайн мэднэ. Тийм учраас би үүнийг хэлж байгаа юм.

Таныг ингэлээ гээд сонгуульд оролцох эрхийг чинь хязгаарлах ч юм уу, ямар нэг байдлаар дарамт шахалт ирэх юм биш биз. Өөрөөр хэлбэл, энэ үйлдэл чинь хууль зөрчихгүй юу?

- Үгүй. Бид ардчилсан нийгэмд амьдарч байгаа, ардчилсан сонгуулиар төр улсаа төвхнүүлдэг монголчууд шүү дээ. Хууль ч ийм байгаа. Тийм учраас би Б. Гарамгайбаатар мэтийн төрийн луйварчдыг УИХ-ын гишvvнээр дахин сонговол хувийнхаа өр төлбөрийг төрийн мөнгөнөөс луйвар хийж төлөх гэж улайран дайрч, дахин дахин төрөөр тоглох нь ойлгомжтой гэж хэлэх гэж байна. Монголын төр бол хувийн мөнгөө өсгөх гэсэн хэн нэгний тоглоом биш, бизнес биш, хувийн банк биш, мөнгөний сейф биш. Тиймээс Монголын төрийг хэмхчих эрх хэнд ч байхгүй гэдгийг хэлье. 

 

Б.Халиун

Эх сурвалж: ZONE.MN

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...