2013 оны 4 сарын 18
Витамин ч гэсэн эм

Манайхан толгой өвдвөл анальгин, халуурвал парацетамол, ходоод өвдвөл ношпа, гүйлгэвэл фталазол гэхчилэн өөртөө онош тавьж, дураараа эм хэрэглэдэг сонин хүмүүс. Өөрөөр хэлбэл, эмийг хүнс шигээ хэрэглээд сурчихсан ард түмэн. Мэдээж хүн эрүүл мэндийнхээ төлөө эм авч хэрэглэлгүй яах вэ. Гэхдээ аль тааралдсан болгоноо эмийн сангаас дураараа авч хэрэглэх нь нийгэмд түгшүүр төрүүлсээр байна. Эмийг их хэмжээгээр хэрэглэвэл өвчин эдгэрч, бие түргэн сайжирна гэж зарим хүн боддог байх.

Ялангуяа ямар ч өвчний үед антибиотек авч хэрэглэх нь хэвийн үзэгдэл болсон гэхэд хилсдэхгүй. Гэтэл сүүлийн үед бидний энэ алдаан дээр “дөрөөлөн” бизнес хийгчид олширлоо. “Витаминжуулалтын аян” гэсэн  сүржин нэрийн дор хүнсний дэлгүүрээс олон байдаг эмийн сангууд ашиг орлогоо нэмэгдүүлэх хэрэглүүрээ болгоод байна. Монгол орны цаг уурын эрс тэс уур амьсгалын нөлөөгөөр хаврын улиралд бидний дархлаа сулардаг. Тиймээс аливаа өвчнөөс урьдчилан сэргийлж, витаминжуулалт явуулж буй нь зөв. Гэхдээ ямар ч насны хүн эмийн санд нь ороод хүнсний дэлгүүрээс хүнсээ авч байгаа юм шиг сагс дүүрэн витамин аваад гарахад манайхаар дахин үйлчлүүлээрэй. “Витаминжуулалтын аян”-ы хугацаанд дахин үйлчлүүлвэл тэдээс тэдэн хувь хөнгөлөлттэй шүү гэж хэлээд зогсч байж таарахгүй байлтай. Витамин хэдийгээр биеийн эсэргүүцлийг сайжруулдаг боловч хэтрүүлэн хэрэглэвэл бусад эм шиг хортой гэдэг нь ойлгомжтой. Тухайлбал, “С” витамин биеийн эсэргүүцлийг сайж­р­уу­лан ханиаднаас сэргийлдэг ч тунг нь ихдүүлбэл нойр булчир­хайн үрэвсэл, чихрийн шижин үүсгэдэг аюултай гэнэ билээ.

Улмаар ходоод гэдэсний салст цочроож шарх сэдрээдэг болохоор “С” витамины гадуур нь чихрэн бүрхүүлтэй үйлдвэрлэдэг гэдгийг учир мэдэх хүмүүс ярих юм билээ. Мөн ихэнх хүмүүс витамины дутагдал гэж ярихаас витамины илүүдлийн талаар ямар ч мэдлэггүй байдаг. Тэгвэл витамины илүүдэл нь дутагдлаасаа илүү аюултай байдаг байна. Хэдий витамин ч гэсэн химийн элемент, эмийн бодис орсон гэдэг нь ойлгомжтой. Тиймээс витамин ч гэсэн эм гэдгийг санаж, ямар нэгэн аян зарлаж байгаа нэрийн дор “бөөнөдөөд”  байдаг зүйл биш гэдгийг бодох хэрэгтэй байна. Витамин, хүнсний нэмэлт бүтээгдэхүүнийг жоргүй олгодог. Тиймээс сүүлийн хэдэн жил эмээр бизнес хийгчид үүнийг овжиноор ашиглан нийтээр нь витаминжуулалт хийж эмийг сагс сагсаар нь бөөнөдөж байгаа. Эмийн санчид нь ч орлогын хойноос хөөцөлдөөд иргэдийн эрүүл мэндийг бодох сөхөөгүй ажилласаар.

Энэ нь ёстой л нэмэр дээр нэрмээс гэгч нь болж эмийн замбараагүй хэрэглээг дэвэргэхэд “Витаминжуулалтын аян” ташуур болоод байх шиг. ЭМЯ, НҮБ-ийн Хүн амын сангаас явуулсан эмийн зохистой хэрэглээний талаархи судалгаагаар эмнэлгээс гадуур эм тариа хэрэглэж байгаа хүмүүсийн 70-75 хувь нь өөрсдөө дур мэдэн эм авч уудаг тухай дурьдсан байдаг. Энэ мэт эмийн замбараагүй хэрэглээ нь тухайн хүний эдийн засагт хохирол учруулдаг төдийгүй хамгийн харамсалтай нь эрүүл мэндээрээ хохирох аюулд хүргэдэг. Тиймээс хэдэн сар эм болох, хор болох нь мэдэгдэхгүй баахан витаминжуулаад өнгөрөлгүй, эм хэрэглэгч энгийн ард иргэдэд төрөл бүрийн витамин, бэлдмэлийн мэдээлэл, танилцуулга, хэрэглэх зааврыг иргэдэд байнга өгч бага ч гэсэн эмийн мэдлэгтэй болгомоор байна. Тэгж чадвал эмийн сангуудын мөнгө олох овжин залийг хазаарлаж, хямдрал зарласан гэх зоргоор сагс сагсаар эм авч хэн нэгний халаасыг зузаатгаж, эрүүл мэндээрээ хохироод байхгүй биз дээ.

 

Эх сурвалж: "Монголын Мэдээ" сонин

Албан ёсны зөвшөөрөлтэйгөөр нийтлэв

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 96016988 утсаар хүлээн авна.
Сэтгэгдлийг ачаалж байна ...