2016 оны 4 сарын 29
Үнэнийг хэлснийхээ төлөө 20 жилийн ял авах ёстой гэж үү

Монголын жүжигчдээс анх удаа Холливудад мөрөө гаргасан жүжигчин Б.Амарсайхан саяхан “Би юу хийчих вээ” хэмээх шторк уншин ард түмний бухимдлыг илэрхийлсэн билээ. Та бидний өдөр тутам хоорондоо ярилцаад, халаглаад шогшроод байгаа нөхцөл байдлыг л тэрээр урансайхны хэлбэрт оруулан илэрхийлсэн. Түүний уншсан шторкын үгс өнөөгийн Монголын нийгмийн бухимдал, цөхрөлийг харин ч товчхон бөгөөд тодорхой байдлаар тасхийтэл нь буулгасан.

 

Гэтэл жүжигчин Амарааг шторк уншин, мэргэжлийн ажлаа хийснийх нь төлөө 16-20 жилээр яллах ёстой хэмээн нэгэн өмгөөлөгч эрхэм айлдсан байх юм. /http://chuhal.mn/r/6109/  Энэ чинь хэддүгээр зуун бэ, хэдэн он бэ? Женко нь ч юм уу, МАН нь ч юм уу захиалаад, “Херо” студийнхэн зохиомжлоод найруулсан шторкийг “амилуулсан” жүжигчин хүн яахаараа гол буруутан болчихдог билээ! Тэгээд ч тэр шторкийг сонирхоод үзэхэд, хэн нэгнийг илт гүтгэсэн доромжилсон гэхээргүй, харин ч ард олны бодол санааг яв цав тусган илэрхийлсэн чамбай бүтээл болсон байна лээ.

Улс орны эдийн засаг хямраад, ард түмэн гуйлгачин болчихоод байгаа нь худлаа гэх үү. Үнэмшихгүй бол захын гэр хорооллуудаар зочлоод нэг үзчихээрэй. Ийм байдалд хүргэсэн буруутнууд нь төр засгийн тэргүүнд сууж буй нөхөд мөн үү? Мөн. Тийм учраас тэдний зураг руу зааж ярихгүй өөр хэн рүү заах юм! Дугаар хорооны Дондог, Дулмаагийн зураг руу заах хэрэг үү. Гадаадын оффшор дансанд нэг сая доллараа “мартсан” нь худлаа юм уу? Үнэн гэдгээ өөрөө батлаад, “мартсан” гэдгээ хүлээн зөвшөөрсөн биз дээ!   Тэрхүү өмгөөлөгчийн ярьж буйгаар, жигтэйхэн ариун цагаан, ямар ч өө сэвгүй сайхан хүмүүсийг жүжигчин Амараа гүтгээд доромжлоод байгаа юм байх. 

Улсаас өч төчнөөн тэрбумаар нь идэж уусан гэгддэг "луйварчдаа" яллаж чадахгүй байж, ганц шторк уншсан жүжигчинд 16-20 жилийн ял өгнө гэж ярих нь зүйд нийцэх ёс суртахуун мөн үү. Хэрэв иймдээ тулбал юун Гитлер, Сталингийн хэлмэгдүүлэлт,  юун ардчилсан улс орон  бэ.

Сонгогчийн эрх рүү халдсан гэх юм бол, одоогийн эрх мэдэлтнүүд дотор ч зөндөө тийм нөхдүүд байж таараа. Угаасаа л сонгуультай жил бие биенийхээ эрх рүү халдан, үнэн худал нь үл мэдэгдэм баримтуудыг хаяглан илгээдэг нь нууц биш, бараг л "стандартын" гэмээр болчихсон үзэгдэл гэхэд хилсдэхгүй. Тэглээ гээд ял шийтгэл хүлээгээд, шоронд суучихсан хүн байна уу?...

 

Д.Мөрөн 

Эх сурвалж: ZONE.MN

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...