2013 оны 4 сарын 9
Экс Ерөнхийлөгч Н.Багабанди 40 000 ам.долларын цалингаасаа хагацах нь

Оюутолгой компанийн ТУЗ-ын гишүүдийн суудал ганхаж эхэллээ. Өнгөрсөн долоо хоногт Иргэний нийгмийн төлөөллүүд хамтран Оюутолгой компанийн ТУЗ-ын гишүүд болох Монгол Улсын экс Ерөнхийлөгч Н.Багабанди, П.Цагаан, Ч.Ганболд нарыг эргүүлэн татах асуудлаар мэдэгдэл хийж, шаардлага гарган Ерөнхийлөгч, Ерөнхий сайд, УИХ-ын даргад хүргүүлсэн.

 

Тэгвэл тус шаардлагын хариу гарсан байна. Өөрөөр хэлбэл Оюутолгойн ТУЗ-ын гишүүдийг эргүүлэн татах асуудлыг Засгийн газар дэмжжээ. Ингэхдээ Иргэний хөдөлгөөнүүдийг зөв зүйтэй санал, санаачлага гаргасан хэмээн Ерөнхий сайд албан ёсоор баяр хүргэсэн аж. Энэхүү асуудлыг Засгийн газрын зүгээс тун удахгүй УИХ-д оруулж хэлэлцүүлж шийдвэрлэх бололтой. Иргэний хөдөлгөөнүүд Оюутолгойн ТУЗ-ын гишүүдийг эргүүлэн татах нь зөв эсэх асуудлаар 6000 гаруй иргэдийн гарын үсгийг цуглуулсан бөгөөд тэдгээрийн 70 гаруй хувь нь ТУЗ-ын гишүүдийг эргүүлэн татах нь зөв гэж үзсэн байна.

 

Монголын талаас “Оюутолгой” компанийн хөрөнгө оруулагч талд тавьж буй шаардлага хатуухан байгаа нь нэг талдаа Засгийн газрын зүгээс Н.Багабандийг ТУЗ-ийн гишүүнээс чөлөөлүүлж, өөрсдийн намаас хүнээ томилуулах гэсэн арга чарга нь байж болзошгүй гэж хэлэх хүн ч цөөнгүй байгаа юм. Нөгөөтэйгүүр, “Оюутолгой” төслийг хэрэгжүүлэхээр хоёр тал гэрээг байгуулснаас хойш иргэний нийгмийн байгууллагуудын зүгээс “УИХ-аас баталсан тодорхой тогтоолыг хэрэгжүүлэх хүрээнд Засгийн газар ажиллаж чадахгүй байна” гэх шүүмжлэлийг өнгөрсөн хугацаанд тавьж ирсний зэрэгцээ “Оюутолгой” ХХК-ийн Монголын талын Төлөөлөн Удирдах зөвлөлийн гурван гишүүн Монгол Улсын төлөө зүтгэхгүй байна гэх мэдэгдлийг дагалдуулж байсан удаатай.  Энэ удаад Иргэний хөдөлгөөнийхөн сансандаа хүрч, экс Ерөнхийлөгч Н.Багабанди 40 000 ам.долларын цалингаасаа хагацах нь тодорхой боллоо.

А.ТЭМҮР

Эх сурвалж:  WWW.ZONE.MN

 

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...