2014 оны 1 сарын 14
С.Дэмбэрэл хууль, хүчнийхнийг атгажээ

МҮХАҮТ хэмээх энэ том байгууллага саяхан оны шилдгүүдийг тодруулж баахан шоудав. Харин тус байгууллагын тэргүүлэгчид энэхүү байгууллагын үйл ажиллагааг хөлдөө чирж буй С.Дэмбэрэл даргыг солих цаг нь болсон гэдгийг нэгэн дуугаар өгүүлж байгаа юм. Энэ байгууллагыг 16 жилийн турш өөрийн эзэмшлийн компани мэт захирч буй С.Дэмбэрэл дарга 2012 онд УИХ-д сонгогдсон ч суудлаасаа ховхрохгүй байгаа нь үйл ажиллагаанд нь сөргөөр нөлөөлөх болжээ.

Түүний хувийн ашиг сонирхол хэт давамгайлах болж, энэ нь танхимын эрх ашигтай илт зөрчилдөж, улмаар тэрбээр байгууллагын эрх ашгийг хохироосон гэмт хэргийн чанартай үйлдэл гаргах болсон гэнэ. Үүнийг нь АТГ шалгаж байх явцад прокуророос хэргийг нь татан авч хэрэгсэхгүй болгосон нь олон түмний гайхшралыг хүргэсэн. Ер нь улс төрч, бизнесмэнүүдийн авлигын хэрэг прокурорын шатанд замхрах болсон явдал сүүлийн үед олонтаа гарах болсон ч ардчилсан Ерөнхийлөгч маань энэ тал дээр огт дуугарахгүй байгаа нь сонин юм. Монголын мянга мянган бизнес эрхлэгчид С.Дэмбэрэлийг нэгэнт хүлээн зөвшөөрөхөө больсон тул тэрбээр даргын албан тушаалаасаа чөлөөлөгдөх цаг нь болсныг харуулж байна. МЗХ-ны ерөнхийлөгч А.Мөнхбат түүнийг Үндсэн хуулийн цэцэд өгч, давхар ажил эрхэлж буй нь хуульд нийцэхгүй байна гэсэн гомдол гаргасан ч цэц асуудлыг С.Дэмбэрэлийн талд шийдсэн нь мөн л хуудуутай үйлдэл байлаа. Танхимын үйл ажиллагаа улс төрөөс ангид байх учиртай гэдгийг олон хүн хэлж байгаа аж.

Ч.Цэцэг

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...