2013 оны 7 сарын 5
“Сочи 2014” олимп цуцлагдах уу

                             -Алан хядагч бүлэглэлүүд Хар далайн хотод анхаарлаа хандуулжээ-

Оросуудын шүдний өвчин болоод байгаа Чеченийн босогчдын удирдагч Доку Умаров бусад бүлэглэлүүдэд хандан “Сочи 2014” өвлийн олимпийн наадмыг тасалдуулахыг уриалсан явдал спортын ертөнцийг болгоомжлолд автуулаад байна. Чечений дайчдын заналхийлэл ОХУ-аас гадна АНУ-ын баг тамирчдын эсрэг чиглэх өндөр магадлалтай гэж ажиглагчид үзэж байгаа юм. АНУ өнгөрсөн 2011 оны арваннэгдүгээр сарын 26-ны өдөр Доку Умаровыг “Аль Каида”-тай холбоотой алан хядагчдын жагсаалтад оруулж, барьж өгсөн хүнд таван сая ам.доллар амласан билээ.

Москва лалын шашинтны эсрэг чиглэсэн бодлогоо сүүлийн үед улам чангатгаж байгаа нь ОХУ-ын нутаг дэвсгэр дээр халдлага үйлдэгдэх давтамжийг ойртуулах болно гэж мэдэгдсэн байна.

Сочигийн өвлийн олимп 2014 оны хоёрдугаар сарын 7-23-ны хооронд зохион байгуулагдахаар төлөвлөгдсөн бөгөөд ОХУ-ын эрх баригчид аюулгүй байдлыг дээд зэргээр хангана гэдгээ амлаад байгаа юм.  Тэд Сочигийн олимпийн бүтээн байгуулалтын бүсэд халдлага үйлдэх гэж байсан Д.Умаровын бүлгийн 10 алан хядагчийг илрүүлж баривчилснаа өнгөрсөн онд зарлаж байсан юм.

Доку Умаров болоод түүний дагалдагчид 2007 онд Кавказын Имират гэгч лалын улсыг байгуулж байгаагаа зарласан байсан бөгөөд ОХУ үүнийг нь “алан хядах бүлэглэл” гэж үздэг юм. Одоогийн Чечений нутаг дэвсгэр дээр лалын шашинтны улс байгуулахыг эрмэлздэг тэрбээр нэгэнтээ дэлхийн өнцөг булан бүрт байгаа лалын шашинтнуудыг хоорондоо нэгдэхийг уриалж байв. Тэрхүү захидалдаа Доку Умаров монголчуудаас лалын шашинтнуудад учруулсан гай зовлонг жишээ болгон дурьдсан байдаг юм. Түүний захидлаас үзвэл оросуудын санаа зовж байгаа чухам тэр асуудлыг хөндсөн нь анхаарал татна. Өөрөөр хэлбэл, Чечений алан хядагчид гадны ертөнцөөс санхүүгийн тусламж авах асуудлыг хөндсөн байгаа юм.

Лалын шашинт улс орнууд төдийгүй АНУ ч Чечений дайчдыг санхүүжүүлэх сонирхолтой байдаг гэж В.Путины засаг захиргаа харддаг билээ. Ливийн дайн дэгдэхэд хойд хөршүүд “Барууныхан Кавказын дайчдыг санхүүжүүлээгүй байхад эрс шийдвэртэй алхам хийгээд яах вэ” гэсхийгээд аялдан дагалдсан. Харин Докку Умаровын захидал нийтлэгдсэний дараа тэд хэн хаанаас чеченьчүүдэд туслах бол гэсэн нэгэн асуудалтай болсон юм. Тэд АНУ-ыг Имиратын эсрэг болгож дөнгөсөн ч одоо олимпийн наадмын аюулгүй байдалд илүү анхаарал тавихаас өөр аргагүй болжээ.    

Лалын шашинтнуудыг нэгдэхийг уриалсан Д.Умаровын захидал

“1428 оны Рамадан сар (2007 оны аравдугаар сарын 7-нд тохиосон) бол Кавказын ард түмний хувьд түүхэн ач холбогдолтой юм. Бид бүхэн Кавказын Имиратыг үндэслэн байгуулсан түүхт өдөр билээ. Кавказын ард түмэн шинэ эринээ эхлүүлээд дөрвөн жил боллоо. 1428 оны Рамдан сар бол зөвхөн Кавказ төдийгүй нийт лалын шашинтнуудын хувьд шинэ үе эхэлснийг бэлэгдсэн юм. Лалын ертөнц өнөөдөр ямар байдалтай байгааг би мэдэж байгаа, тиймээс туслахыг хичээж байна. Шашин нэгт ах дүүс маань дарангуйлагчдыг эсэргүүцэж, амиа алдацгааж байна. Гэхдээ эв нэгдэлтэй байж, энэхүү зовлон гамшгийг даван туулах болно.

Лалын ертөнц түүхэндээ хүнд цаг үеийг туулж байсан тохиолдол бий. Тэр бүгдэд бид дандаа салангид оршиж байсныхаа горыг эдэлж байлаа. Монголчуудтай дайтаж асан Хорезмын шахын түүх үүний тод жишээ. Үхэх сэхэхээ үзэн тэмцэж байх үед нь түүнд аббасидууд ч, египет ч туслаагүй.

Эцэст нь монголчууд халифын улсыг  устгаж, өөрийг нь хөнөөсөн. Лалын шашинтнууд гүн элийрлийн байдал ороод байв. Гэхдээ лам нар, түүхчид ажлаа хийсээр байсан нь бидэнд тэр үеийн талаар тодорхой төсөөлөлтэй болоход тусалсан юм. Тэд монголчуудыг гог, магог (чөтгөрийг хорионоос суллахаар дэлхий дээр ирдэг, шороон түмэн цэрэг) гэж батлан бичсэн байдаг.

Тэд монголчуудыг ийм домгийн амьтантай зүйрлэснээрээ нөхөж залруулж болшгүй алдаа хийж, монголчуудтай тэмцэхийг хэн ч зүрхлээгүй байдаг юм. Учир нь домогт “Бурхан өөрөө л гог, магогийг дарах болно” хэмээн зөгнөсөн байдаг билээ. Худалдагдсан ч байж болох ийм эрдэмтэн, молла нарын мэдэгдлийн дараа лалын шашинт ах дүүс маань зугтахаас өөрийг хийхээ больсон байдаг. 

Монголын арми 100 000, ихдээ л 150 000 хүнтэй байсан атлаа 10 сая лал ахан дүүсийг маань хөнөөсний учир ийм. Тэр үед Египетэд лалын шашинтнууд бас их цөөн байлаа. Хэрвээ тэд үхсэн бол лалын шашин мөхөж ч болох байв.

Гэвч Аллах үнэн хүчээ үзүүлж, Хулагу хааны цэргийг ялснаар шашнаа аварч чадсан билээ. Египет дэх шашин нэгт ахан дүүс маань баатарлаг түүхээ марталгүй үргэлжлүүлж байгааг бахархахын тулд энэ бүхнийг нуршлаа. Бидэнд түүхийн алдааг давтахгүй байх боломж байна.

Тэмцэл, харгислал өмнө нь байсан, одоо ч байна. Бид бүгд үүнийг Аллахын төлөө хийдэг, учир нь Аллах байгаа учраас л бид оршиж байгаа. Жихадад (лалын эсрэг үзэлтнүүдтэй хийх ариун дайн) нэгдээгүй хүмүүс, эсвэл нэгдсэн ч замын дундаас буцсан хүмүүс үхэх шийтгэл хүртэх нь зүй ёсны хэрэг юм.

Бид өнөөдөр өөрсдийн хүч бололцоогоо дээд зэргээр дайчлан жихадыг хийж байна. Хэрвээ бидэнд жаахан илүү хүч байсансан бол илүү амжилттай тэмцэж чадах байлаа. Бидний жихадад “үл итгэгчид” (лалаас өөр шашинтай хүмүүсийг хэлж байгаа бололтой), тусгай албаныхан саад болохыг оролдож байгаа юм.

Гэхдээ бид тэдэнд хүнд цохилтуудыг өгсөөр байна. Бидний ахан дүүс Москвад истишхад хийсэн нь амжилттай боллоо (Домодедовод болсон халдлагыг хэлж байна). Түүнийг бидэнд бичлэг ирүүлэх хүртэл энэ тухай мэдээлэлгүй байсан. Бид ахан дүүсээ нууцлахыг хичээсэн бөгөөд тусгайгийнхан түүний хувийн мэдээллийг тодорхой болгосны дараа л бичлэгийг олон нийтэд дэлгэсэн юм.

Оросууд биднийг яагаад халдлага болсон даруйд бичлэгийг дэлгээгүй талаар олон л таамаглал дэвшүүлж байсан. Харин бид бол гэр бүлийнхнийг аврахын тулд л тэгсэн юм. Тусгайгийнхан хэрхэн ажилладагийг мэддэг болохоор тэр.    

Энэ жил бидний хувьд маш сайхан эхэлсэн. Олон ч ажиллагааг амжилттай болголоо. Гэхдээ мэдээж, бидэнд бэрхшээл бий. Бүр маш их бэрхшээл. Бид бүхнийг төлөвлөдөг ч санаснаар болохгүй байх тохиолдол гардаг.

Дайснууд маань бас унтахгүй байгаа нь мэдээж хэрэг. Тэд бидний үйлдэлд хариу өгөхийг хичээж, нэг бус төлөвлөгөөг маань тасалдуулж байлаа. Гэхдээ л Аллахын тааллаар болж байгаа учраас амжилт олж байгаа юм.     
         
Имират Кавказ бол лалын ахан дүүсийг нэгтгэхийн тулд байгуулагдсан юм. Хадист “Лалын шашинтнууд бүгд нэг бие организм шиг” гэж дурьдсан байдгийг санацгаая. Бие биедээ тусалдаг, бие биедээ хайртай нэгэн бүхэл организм. Хэрвээ биеийн нэг хэсэг өвдвөл бие бүхэлдээ өвдөнө. Энэ нь биднийг бие бидээ тусалж байх ёстой гэдгийг харуулж байгаа юм. 

Хадист мөн Шүүлтийн өдөр ирэх тухай бий. Тэр өдөр бид бүгд Аллахын өмнө гэмээ наминчлах болно. Люля Кадыров үргэлж л “Би В.Путиныг хүндэлдэг, би В.Путинд хайртай” гэж ярьж байна. Шүүлтийн өдөр тэр В.Путинтэйгээ хамт Аллахын гэсгээлийг амсах болно. Имиратын талаар тэдний ярьж байгаа зүйлд нэг ч грамм үнэн байхгүй. Аслан Масхадов бол бидний жинхэнэ үнэнч ахан дүүсийн нэг байсан юм шүү. 

Имиратыг байгуулснаас хойш дөрвөн жил өнгөрлөө. Би нийт лалын шашинт ахан дүүсдээ Ариун сарын мэндийг хүргэе. Бид бүхэн Шүүн таслах өдөр бүгд Аллахын өмнө зогсоно гэдгийг ахан дүүсдээ болоод дайснууддаа сануулья.

Аллахын алдар бадраг.   
Имират Кавказын амир
Докку Абу Усман (Докку Умаров)” гэжээ.

Х.Батсайхан

Албан ёсны зөвшөөрөлтэйгөөр нийтлэв