2018 оны 12 сарын 24
Том том мөнгө хэрэглэдэг мөртлөө ТООНД муу, тэр хэн бэ?

300 хүний бүрэлдэхүүнтэй хуралд Монгол Улсын 21 аймаг, 330 сум, нийслэлийн 9 дүүргийн төлөөлөл оролцсон юм байна. Энгийн математикаар бодоход 21 аймаг, 330 сум, 9 дүүргийн төлөөлөл нийлээд багаар бодоход 360 хүн болж байна. Сум, дүүрэг бүрээс нэг л төлөөлөгч оролцуулаад энэ. Дээр нь хурлын хүндэт зочид болох Д.Оюунхорол, М.Билэгт нарыг нэмэхээр эрхэм гишүүн Ж.Мөнхбатын хэлсэнчлэн 300-аас хол илүү болж байгаа юм.

Гэхдээ УИХ-ын гишүүн Ж.Мөнхбатын хэлсэнчлэн түүний зохион байгуулсан МАН-ын Гишүүд, дэмжигчдийн холбооны анхдугаар их хуралд нь 50 гаруйхан хүн сууж байгаа харагдсан. Бүгд бичлэг дээр харагдаж байна билээ. Угаасаа Ж.Мөнхбат зохиолч, яруу найрагч гэдэг утгаараа аливаа асуудлыг дэвэргэж, ургуулан бодох авьяастай. Ямартаа л өөрийн зөвлөхийг үеэлтэйгээ маргалдаад газтай ундаагаар толгойдоо цохилоод багахан шалбархай болсон явахад нь шалбархайн зургийг нь тулгаж байгаад томруулж аваад тулаант кино шиг юм болсон мэтээр мэдээлж байсан. Зөвлөх нь орц руугаа ороход араас нь хоёр хүн боож унагаагаад, толгой руу нь трубадсан гэж ярьсан шүү дээ. Ийм л дэгс хүн 50 хүн суулгачихаад Монгол Улсын өнцөг булан бүрээс гишүүд, дэмжигчдийн төлөөллийг хамруулсан “ихээс их хуралдай” зохион байгууллаа гэж зарлаж чадах л даа.

 

Гэхдээ эрхэм гишүүн үнэхээр тоо мэддэггүй болох нь анзаарагдаад байгаа юм. Өмнө нь түүнийг “Сүхбаатар дүүргийн нэгдүгээр хороо Олимпийн гудамж, 16 дугаар байр буюу “Regensy Residense” хотхоны 1501 А тоот байранд 260 метр кв сүүлийн үеийн тансаг зэрэглэлийн байрыг худалдан авахдаа 2 тэрбум төгрөг төлсөн ба эхнэрийнхээ нэр дээр 1501 Б тоотыг нь тэрбум төгрөгөөр худалдан авч, нийтдээ 430 мКв талбайтай, дотроо хоёр давхар байрыг 3 орчим тэрбум төгрөгөөр худалдан авсан” гэх мэдээлэл тархаад байсан. Үүнийг тайлбарлахдаа Ж.Мөнхбат “Энэ байрыг авахдаа Зайсанд байсан байраа худалдаж, тэр мөнгөө байр авахад зориулсан. Дээр нь эхнэрийн нэр дээр нэхмэл, оёмол, сүлжмэлийн үйлдвэр ажилладаг. Энэ үйлдвэрийнхээ зарим тоног төхөөрөмжийг худалдсан. Хэдэн төгрөгөөр худалдсан, хэнд худалдсан зэрэг нь гэрээ, үнэ өртгөөрөө байгаа. Мөн банкнаас худалдаж авч байгаа байраа 150 мянган ам.доллараар барьцаалж, авсан” гэсэн. 

 

Гэтэл Ж.Мөнхбат энэ удаад бас л тоондоо алдсан байдаг. Учир нь тэрбээр Хан-Уул дүүрэгт байрлах “Сөүл рояал каунти” хотхон дахь таван өрөө орон сууцаа худалдаж 800 сая төгрөг олж, улмаар эхнэрийнхээ эзэмшлийн “Баян лайф стайл” сүлжмэл бүтээгдэхүүн үйлдвэрлэдэг компанийн тоног төхөөрөмжийг худалдаж 300 сая төгрөг олсон байдаг. Мөн “Чингис хаан” банкнаас жилийн 12 хувь буюу сарын нэг хувийн зүйлтэй бизнесийн зээлийн нөхцөлөөр 150 мянган ам.доллар буюу 390 сая төгрөг зээлсэн ба өнгөрөгч оны гуравдугаар сарын 18-ны өдөр “Улаанбаатар паласе”-д тоглолт хийж 140 сая төгрөгийн орлого олсон боловч энэхүү мөнгийг нийт 100 оюутны сургалтын төлбөрийн тэтгэлэг болгоод өгчихсөн гэсэн. Ингээд тооцоо хийж үзвэл, нийтдээ нэг тэрбум 600 мянган төгрөг болж байна. Тоглолт хийж олсон гэх 140 саяыг нэмсэн ч орон хоёр тэрбум 275 сая сууц худалдан авахад даруй нэг тэрбум төгрөг дутаж байгаа тухай тооцоо гарсан байсан. Ийм л тооны зөрүүтэй том тоо ярьдаг гишүүнтэй болчихлоо.

 

УИХ-ын гишүүн Ж.Мөнхбатыг хувийн бизнесгүй байж 3 тэрбумын үнэтэй байр худалдан авсныг нэг хэсэг шуугисан. Гэхдээ мане эр тоондоо муу болохыг харгалзан үзэхийг зөвлөх байна. Юутай ч эрхэм гишүүн “Чингис хаан” банкнаас 150 мянган ам.долларын өр тавьчихаж, түүнийх нь эргэн төлөлт, сар бүрийн хүү болох 7750 ам.долларыг ямар эх үүсвэрийн мөнгөөр төлж байгаа бол гэдэг сонин. Тоондоо муу хүн болгоод л байдаг юм байх даа. Цаана чинь ам.доллар 2600 хол давчихаад байдаг.

 

 

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...