2018 оны 12 сарын 6
М.Энхболд “овоо эр” юм

 

УИХ-ын дарга М.Энхболдыг 60 тэрбумын гэх хэрэгт холбогдсоны дараагаас сошиалд “Энх60лд” гэж бичдэг болоод байгаа. Ер нь олон нийтийн сүлжээнд түүнийг хочилж, гоочлох байдал утгаа алдсан гэхэд болно. Хэлсэн үгийг нь байнга мушгина. Царай төрх, биеийн ерөнхий байдлаар нь урд зүгийнх болгож ч үздэг. За даа, сайн зүйл тун ховор дуулддаг. Хамгийн эерэг нь “Намрын цэцгийг уяраадаг аядуу зөөлөн” гэх утга бүхий тодорхойлолт юм даа.

 

Гэхдээ түүнийг юу ч гэж гоочилдог байлаа гэсэн мань эр тавьтаргүйтэж, эсэргүүцэл, эгдүүцэл илэрхийлээд байдаггүй юм байна шүү. Бодоод үзэхэд тийм дүр зураг нь санаанд буухгүй л байгаа юм. Энэ нь түүнийг ухаантай гэх үү, уужуу дотортой гэх үү? Ямартай ч аядуу зөөлөн хүн гэж ойлгохоос өөр аргагүй болж байна. Тийм болохоор л М.Энхболдыг “овоо эр” юм гээд байгаа юм. Гэхдээ бас түүнийг ухаантай, ноён нуруутайдаа энэ их үймээн, эсэргүүцлийн эсрэг чимээгүй суугаад байгаа юм биш гэж хэлэх хүн таарч байна. Ямар нэгэн юм хэлвэл нийт Монголын ард түмэн зэрэг эсэргүүцэх байдал үүсчихээд байгааг мэдээд байгаа юм гэнэ. Түүнээс шударга, ажил хэрэгч, олондоо нэр нүүртэй хүн байсан бол өдийд ингээд суудалтайгаа зууралдаад суугаад байхгүй шүү дээ гэж тайлбарлаж байх юм. Тийм байсан ч овоо эрийн шинж биш гэж үү. Олон нийтийн уур амьсгалыг мэдрээд таг дуугүй гүлдийж байгаа чинь овоо л эрийн шинж байж таарна.

 

Дөнгөж УИХ-ын гишүүнээр сонгогдсон “шинэков” гишүүн насаараа төрийн бүх л албан тушаалыг хашиж үзсэн хүний өөдөөс харчихаад “Монгол Улсын төрийн сүлд, Монгол Улсын төрийн далбаа, Монгол Улсын Үндсэн хуулийн өмнө М.Энхболд дарга аа, та 60 тэрбумын бичлэг дээр байгаагүй гэдгээ хэлээд өгөөч. Тэр үнэхээр эвлүүлэг юм уу? Таны дуу биш үү? Та миний нүд рүү харж байгаад хэлчих. Та үнэхээр тэр бичлэгт байгаагүй юм уу? Монголын ард түмний өмнө чин сэтгэлээсээ хэлчих” гээд дөвчигнөж байхад М.Энхболд дарга тэвчээртэй сууж л байгаа юм. Өөр хүн байсан бол аль эрт “морио унаад зугтчихсан”. Бараг ихэнх нь шанаадаад авсан байгаа. Манай томчууд чинь нэгнийгээ шанаадаад авдаг гээ биз дээ. Хэрэв буруу хараагүй бол саяхны чуулганы хуралдаан дээр нүдэнд нь цус хурчихсан харагдах шиг болсон шүү, хөөрхий. Энэ бүхнийх нь төлөө түүнийг “овоо эр” юм гэж магтах нь зүйтэй гээд байгаа юм. Бид чинь энэ овоо эрээр удирдуулж байгаа гэж бодох ч сайхан байна.

 

Гэхдээ л мань эр "60 тэрбумын бичлэг эвлүүлэг ээ" гээд хээв нэг хэлчихсэнгүй. Таг дуугүй дүмбийж сууснаас нь бодоход бичлэг "үнэн" гээд ч хэлчих мэт. Ямартаа ч М.Энхболд гэх "овоо эр" төрийн өндөр сэнтийгээс эрийн сайнаараа буугаад ирэх өдөр тун удахгүй ирэх бизээ.

М.Гал

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...