2018 оны 8 сарын 9
Тарваган тахал нийслэлд морилох дөхөв

Монголчуудын бараг  тал хувь нь амьдардаг нийслэл хотод мал амьтны гоц халдварт өвчин орж ирэх гээд байдаг гэмтэй болсон. Өнгөрсөн  жил мал, амьтны гоц халдварт шүлхий өвчин Сонгино хайрхан, Хан-Уул дүүрэгт гарч хөл хорио тогтоон олон  хүний ажлыг алдагдуулж хүндрэл чирэгдэл учруулсан. Энэ жил тарваган тахал байж болзошгүй хоёр дахь тохиолдол нийслэлд тохиолоо.

Хан-Уул дүүрэгт найман настай хүүхэд тарваган тахлаар халдварласан байж болзошгүй гэсэн дуудлага холбогдох байгууллагынханд иржээ. Тарваганы түүхий давсаг хоёр  ширхгийг залгисны дараа хүүхдийн биед өөрчлөлт орсон бололтой. Шинжилгээгээр тарваган тахлын сэжиг илрээгүй байна. Гэхдээ энэ бол том дохио. Тарваганы түүхий эрхтнийг домын аргаар хэрэглэдэг сэтгэлгээ эргээд хүний амь насыг эрсдэлд оруулсан хэвээр. Манай улсад тарвага агнахыг салбарын сайдын тушаалаар хориглосон ч зөрчил гарсаар байгаагийн илрэл нь тарваганы давсаг залгисан үйлдэл гэрчилж байх жишээтэй.

Нэгэн жишээ.

Тарваган тахал өвчнөөс урьдчилан сэргийлэх, хууль бусаар тарвага агнах, тээвэрлэх, худалдах ба худалдан авах үйл ажиллагаа явагдаж болзошгүй байгаа энэ үед Мэргэжлийн хяналтын байгууллагаас хяналт шалгалт хийж байгаа. Шалгалтаар 42 тарвага, 16 буу, 26 хавх хурааж, гурван хэрэгт зөрчлийн хэрэг үүсгэжээ. Хэнтий аймагт 14 тарвага, 26 хавх, таван буу, нэг автомашин хурааж, цагдаад шилжүүлэн зөрчил гаргасан этгээдэд торгууль, нөхөн төлбөр ногдуулсан.

Бас нэгэн жишээ

Архангай аймагт 16 тарвага, найман буу хураасан бол Өвөрхангай аймагт 12 тарвага, гурван  буу, 24 ш сум, хоёр хутга хурааж, нэг үйлдэлд зөрчлийн хэрэг нээн шалгаж байна. Энэ бүхэн ойрын өдрүүдэд  гарсан илэрсэн, илрүүлсэн зөрчлийн жишээ.

Өдгөө хөдөө орон нутаг уруу чиглэсэн хотынхны урсгал татарч, орон нутгаас оюутнууд голдуу урсгал хот чиглэж эхэлсэн. Энэ үед л тарваганы мах, арьс борлуулах гэсэн үйлдлүүд, зөрчил нэмэгддэг.   Иргэд холбогдох хуулийг зөрчин хавх, нохойгоор тарвага барих, ангийн буу бусдад шилжүүлэх, тарваганы түүхий мах, арьсыг хот тосгонд оруулах зэрэг зөрчил гаргасаар байна. Иймд тарваган тахлаас урьдчилан сэргийлж, хууль бусаар тарвага агнах, худалдаалах, худалдан авах, тээвэрлэх зэргээс татгалзаж, сонор сэрэмжтэй байхыг иргэдэд анхааруулсаар байгаа юм.

А.Эрдэнэ

www.zindaa.mn

 

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...