2017 оны 12 сарын 7
Ц.Цогзолмаа: МУИС-ийг дэлхийн топ сургуулиудын нэг болгоход үе шаттай бодлогыг хэрэгжүүлнэ

УИХ-ын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэг, УИХ, Засгийн газрын гишүүн, Боловсрол, соёл, шинжлэх ухаан, спортын сайд Ц.Цогзолмаа нар өчигдөр Монгол Улсын Их Сургууль дээр ажлын уулзалт хийж тус сургуулийн үйл ажиллагаатай танилцлаа. Уулзалтад МУИС-ийн захирал, доктор Я.Төмөрбаатар, МУИС-ийн Эрдэм шинжилгээ, инноваци, гадаад харилцаа хариуцсан дэд захирал Б.Очирхуяг, МУИС-ийн Сургалт, оюутан хариуцсан дэд захирал Б.Очирхуяг, МУИС-ийн Захиргаа, дотоод хамтын ажиллагаа хариуцсан дэд захирал Ч.Ундрам, МУИС-ийн бүрэлдэхүүн сургуулийн захирлууд болон бусад газар, хэлтэс, албадын дарга нар оролцсон юм.

Уулзалтаар МУИС-д тулгамдаж буй асуудлууд, ойрын хугацаанд хийхээр төлөвлөж буй ажлуудыг танилцуулан санал солилцов. Түүнчлэн УИХ, Засгийн газраас тус сургуульд үзүүлэх тусламж, дэмжлэгийн талаар ярилцлаа.

Уулзалтад МУИС-ийн захирал, доктор Я.Төмөрбаатар үг хэлэв. Тэрбээр “Үндэсний ууган их сургуулийн хувьд бид Монгол Улсын оюуны тусгаар тогтнолын баталгаа болж ажилладаг. Монгол Улсын Их Сургууль Азийн шилдэг 100 их сургуулийн нэг болох, Цахим их сургууль болох, Судалгааны их сургууль болох, багш нарынхаа оюуны бүтээлийн үнэлэмжийг дээшлүүлэх, манай хичээлийн хөтөлбөрүүд олон улсад магадлан итгэмжлэгдэж дэлхийн түвшинд үнэлэгддэг болох зэрэг олон зорилтыг тавин ажиллаж байна” гээд тус сургуулийн статусыг хууль, эрх зүйн орчны хувьд баталгаажуулах, төрийн өмчийн их, дээд сургуулиудад төрөөс үзүүлж буй дэмжлэгийг ажлын үр дүн, ахиц, дэвшлээс хамааран ялгамжтай үзүүлэх зэрэг олон ажил хэрэгч саналыг сайдад уламжилсан юм.

Уулзалтын дараа МУИС-ийн шинээр баригдаж буй болон актлагдах хичээлийн байр /Хичээлийн 4, 6-р байр/, баригдан ашиглалтад ороод буй МУИС-ийн Номын сангаар зочилж уншлагын танхим, Брэнд шоп, лабораториуд, хурлын танхим, Эрдмийн музейгээр зочилж Хүндэтгэлийн дэвтэрт дурсгалын үг үлдээв. Мөн энэ үеэр БСШУС-ын сайд Ц.Цогзолмаа МУИС-ийн Эрдмийн музейн шилэн хорго засварлах санхүүгийн дэмжлэг болон их сургуулийн түүхийг харуулах видео сэлтийг тогтмол үзүүлж байх дэлгэц бэлэглэхээр боллоо.

БСШУС-ын сайд Ц.Цогзолмаа хэлэхдээ, “Монгол Улсын хөгжлийг сүүлийн 75 жил түүчээлэн авч яваа боловсон хүчний дийлэнх нь МУИС-ийн эрдэмтэн багш, төгсөгчид гэж би ойлгодог. Бид дээд боловсролын тогтолцоогоо үнэлэх, дүгнэх цаг болсон. Энэ ажлын цөмийг МУИС гүйцэтгэнэ. Боловсрол, соёл, шинжлэх ухаан, спортын яам үндэсний, ууган их сургуулиа түшиж ажиллах бодолтой байгаа. Миний зүгээс эхний шийдвэрээ МУИС-ийн “үндэсний” статусыг хамгаалах чиглэлд гаргах болно. Яагаад гэвэл үндэсний боловсон хүчнийг бүх салбарт бэлтгэдэг учраас тусгайлан үндэсний гэх статусыг хамгаалж авч явах учиртай. Гадны олон орны жишээг та бүхэн мэднэ. Тухайлбал, Японд Токиогийн их сургууль, БНХАУ-д Синьхуа их сургууль гээд үндэснийх нь их сургууль тухайн үндэстнийхээ боловсон хүчний нөөцийг бэлтгэдэг. Монгол Улсын боловсон хүчний нөөцийг бэлтгэдэг сургуулийнхаа статусыг хамгаалах, бодлогоор дэмжихэд манай яамны зүгээс онцгойлон анхаарах болно. Шийдвэрлэх ёстой асуудлуудыг үе шаттайгаар шийдвэрлэнэ. Үүний хүрээнд сайдын зөвлөлийг байгуулж байгаа. Энэ зөвлөлд МУИС-ийн захирал, доктор Я.Төмөрбаатар орно. Дээд боловсролын тогтолцоог үнэлэх, дүгнэх, шинэтгэх ажилд МУИС-ийн эрдэмтэн багш нарын саналыг авах хүсэлтэй байгаа юм. Боловсрол, соёл, шинжлэх ухаан, спортын яамнаас МУИС-ийг Азийн шилдэг их сургууль, цаашлаад дэлхийн шилдэг их сургууль болоход бодлогын болон бусад шаардлагатай дэмжлэг, туслалцааг өгөх болно” гэлээ.

Ийнхүү Боловсрол, соёл, шинжлэх ухаан, спортын сайд Ц.Цогзолмаа их, дээд сургуулиудын үйл ажиллагаатай танилцах уулзалтаа Монгол Улсын ууган их сургуулиас эхлүүллээ.

Б.Янжиндулам

www.zindaa.mn

 

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...