2017 оны 11 сарын 14
Хүн дээрэмдэхийн оронд насанд хүрэгчдийн кинонд тоглож явсан Сильвестр Сталлоне

“Олс минь эцэстээ тулаад байсан болохоор надад тэр бохир кинонд тоглох эсвэл гараад хүн дээрэмдэх гэсэн хоёрхон сонголт л байсан”

Тэрээр 1946 оны 7 сарын 6ны өдөр хорвоод мэндэлсэн юм. Эрүү нь саажилттай байсан учраас хэл орохдоо ээрч ярьдаг болов. Хөлийнх нь ул хавтгай байсан учраас 4 настайд нь товшуур бүжгийн сургалтад хамруулахаас өөр арга эцэг эхэд нь байсангүй. Сурагч болоод дорвитой сурч чадалгүй, хэд хэдэн сургуулиас хөөгдсөн байна. 9 настайд нь эцэг эх нь салсан учраас хүү Филадельпиад эхтэйгээ амьдрах болов. Тэндээ асуудалтай хүүхдүүдэд тусгайлан зориулсан ахлах ангид хамрагдах болжээ. 24 настайдаа хүү жүжигчин болох мөрөөдлөө биелүүлэхээр коллежоо хаяв. Мөрөөдлөө биелүүлэхээр Нью Йоркийг зорьж очсон боловч харамсалтай нь хүүг үргэлж хаалттай, үгүйсгэсэн хаалга угтаж байлаа. Мөнгө ч үгүй, тартагтаа тулсан тэрбээр автобусны буудал дээр 3 долоо хоног амьдарч хүртэл үзсэн байв. Зөвхөн аяга хоол олж идэхийн төлөө өөрт нь олдсон ямар ч ажлыг гололгүй хийж байсан ч амьдралынх нь хамгийн хүнд үетэй харьцуулахад тэр бүхэн нь юу ч биш байсан гэдэг. Тэрээр хар багаасаа ижилдсэн дассан хайртай нохойгоо архины дэлгүүр таарсан хүнд ердөө 25 доллараар заржээ. Хайртай нохойгоо тэжээж чадахгүй байснаасаа болж зарахаас өөр аргагүйд хүрсэндээ харамсаж уйлж байснаа хожмоо тэрээр дурсаж, амьдралынх нь хамгийн хүнд өдөр байсан гэж ярьсан байдаг.

Ингээд сүүлдээ амжилт олох мөрөөдөл нь ч мартагдах дөхөж, зөвхөн амьд үлдэхийн төлөө 200 доллараар насанд хүрэгчдийн кинонд тоглохоор шийдсэн байна. Хожмоо тэрээр “Олс минь эцэстээ тулаад байсан болохоор надад тэр бохир кинонд тоглох эсвэл гараад хүн дээрэмдэх гэсэн хоёрхон сонголт л байсан” гэж дурсаж байв. Эцэст нь амьдралыг нь орвонгоор нь эргүүлэх нэг үйл явдал тохиолдож ирээдүйг нь өөрчилж орхих нь тэр. Мухаммед Алигийн тулаанныг зурагтаар үзэж суугаад амжилт олох нь байтугай амьдрах итгэлгүй болоод байсан залуу эрд шинэ киноны санаа төрөв. Ингээд амьдралыг нь өөрчлөх кино зохиолоо бодит болгохын тулд 3 хоног нойр, хоолгүй шахуу суужээ. Продюсерууд зохиолд нь 350 мянган ам.доллар санал болгосон ч тэрээр татгалзав. Учир нь өөрөө гол дүрийг нь бүтээхийг хүсэж байлаа. Продюсерууд түүнийг жүжигчин болох нь байтугай ч ярих ч чадваргүй гэж үзэж байсан ч тэрээр бууж өгсөнгүй. Ингээд үзэл бодолдоо шаргуу үнэнч залууг продсерууд киноных нь гол дүрд шалгаж үзэхээс өөр аргагүй болж, тэрээр ч чадна гэдгээ баталж, дүрээ авчээ. Энэ түүхийн эзэн хэн гэдгийг та бүхэн бараг гадарласан байх. Тиймээ, Холливуудын алдарт жүжигчин Сильвестр Сталлоне 1976 онд дэлгэцэнд гарсан Роки кинондоо гол дүрийг бүтээх хүртлээ насанд хүрэгчдийн киног нь тооцолгүйгээр 7 жилийн турш 17 кинонд үзэгдээд өнгөрөх жижиг дүрүүдийг бүтээж, хоногийн хоолтойгоо золгож байсан ч Роки кино амьдралыг нь өөрчилж, олон улсад данстай мундаг кино жүжигчин болгожээ. Цалингаа аваад хамгийн түрүүнд юу хийсэн гээч. Ядуурч, явгарч, хоолгүй хонож, тартагтаа тулах үедээ 25 доллараар зарсан нохойгоо 15 мянган ам.доллараар буцаан худалдаж авчээ. Өнөөдөр Сталлонегийн төрөлх Филадельпиа хотын төв музейн хажууд алдарт Роки дүрийнх нь хөшөө сүндэрлэн буй. Цагтаа гудамжинд сонин нөмрөөд хэвтэж байсан энэ хүн дэлхий дахинд алдаршсан кино жүжигчин, зохиолч, найруулагч төдийгүй мөрөөдөлдөө үнэнч сая сая залуусын хувьд урам зориг болжээ. Өөрөөс нь амжилтад хүрсэн гол нууцыг нь асуухад “Тулгарсан ямар ч асуудал, зовлон, бэрхшээлд мөрөөдлийг нь бяц дарах боломжийг олгоогүйд миний нууц оршино” гэж хариулж байжээ. Хэрвээ тэрхэн мөчид хоолгүй шахуу байсан залуу 350 мянган доллар гэх асар их мөнгөний саналыг хүлээн авсан бол өнөөдөр бид Сильвестр Сталлоне гэж мэдэх нь байтугай Роки Балбоагийн дүрийг огт өөр хүнээр л төсөөлдөг байх байжээ. Хүний амьдрал үнэхээр баян гэж л энэ байх даа. Одоо 71 настай Сталлоне 400 сая ам.долларын хөрөнгөтэй, чинээлэг эр болжээ.

 

 

 

 

 

 

Ж.Сондор

 

Эх сурвалж : ZONE.MN

 

 

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...