2017 оны 10 сарын 13
Gucci жинхэнэ үслэг эдлэлээс татгалзлаа

 

Италийн алдартай загварын ордон болох Gucci 2018 оноос эхлэн өөрсдийн бүтээгдэхүүнд жинхэнэ амьтны үс хэрэглэхээс татгалзахаар шийджээ. Энэ тухай Independent мэдээлсэн байна.

 

“Gucci-ийн гол үнэт зүйлсийн нэг бол нийгмийн хариуцлага. Иймээс бид хүрээлэн буй орчин, амьтадтай холбоотой нөхцөл байдлыг сайжруулахын тулд бүхий л боломжтой зүйлсийг хийхээр эрмэлзэж байна” хэмээн тус загварын ордны тэргүүн Марко Бикарри Лондонгийн загварын коллеж дээр үг хэлэхдээ онцлон тэмдэглэжээ.

 

Gucci загварын ордон 2018 оны хавар-зуны коллекцээс эхлэн жинхэнэ үслэг эдлэлээс татгалзахаар болсон аж. Загвар зохион бүтээгчид булга, чоно, үнэг, туулайн арьсуудыг ашиглахаа болих юм байна.

 

Gucci-ийн бодлогод орж буй энэхүү өөрчлөлтийг тус брэндийн багт 2015 онд орж ирсэн зохион бүтээгч захирал Алессандро Микеле санаачлан гаргасан аж. Gucci мөн амьтдын эрх ашгийг хамгаалах үйлс эрхлэн, амьтдын үс ашиглахын эсрэг тэмцдэг Дэлхийн эвсэлд нэгдэхээр болжээ.

 

Амьтдын жинхэнэ үс бараа бүтээгдэхүүндээ ашиглахаас өмнө нь Armani, Calvin Klein, Ralph Lauren, Hugo Boss, Vivienne Westwood болон Италийн тансаг зэрэглэлийн Yoox Net-A-Porter Group татгалзаад байсан билээ.

 

Д.Мөрөн

Эх сурвалж: ZONE.MN

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...