2017 оны 10 сарын 12
Та нар маань яагаад ийм юм бэ...

 

Монгол улсын эрдэм боловсролын ууган “уурхай” болох МУИС-ийн 75 жилийн ойг саяхан ёслол төгөлдөр тэмдэглэсэн билээ. Тус сургуулийн түүхт ойг угтсан олон бүтээлч ажлууд хийгдсний дотор хамгийн супер нь орчин үеийн олон улсын жишиг стандартад төгс нийцсэн шинэ Номын сангийн нээлт байсан юм.

 

 

Оюутан залуус чөлөөт цагаараа сууж ном эрдэмд шамдан боловсрох үйлсэд ихээхэн хувь нэмэр болохуйц энэхүү Номын сангийн гадна, дотор тохижилтын талаар бахдан магтахад сайн сайхан үгс ч үл хүрэлцэхээр.

 

 

Гэтэл нээлтээ хийгээд долоо ч хоноогүй байхад шинэ сайхан тавилганы энд тэнд нь элдэв зүйл эрээчиж бичээд эхэлчихжээ. Иймэрхүү зураг олон нийтийн сүлжээгээр явж байхыг хараад үнэхээр харамсмаар, хэлэх ч үг алга...

 

 

МУИС хэмээх манай улсын №1 топ их сургуульд элсэн орсон суралцагч бол үеийнхэн дотроо сурлага мэдлэгээрээ ялгарч чадсан байж таарна. Гэтэл заримынх нь ёсзүй, ёс суртахуун яагаад ийм бүдүүлэг байна вэ! Хэдийгээр эрдэм мэдлэг арвин боловч зөв ёс суртахуунтай хүн болж төлөвшиж чадаагүй бол хэзээ ч амжилтанд хүрэхгүй. Гоё сайхан орчноо сэтгэлээсээ мэдрэн таашаал авч, түүнийг тэр хэвээр нь өнө удаан байлгахын тулд хайрлан хамгаалдаг бол хичнээн сайхан!

 

Бага гэлтгүй, наад захын иймэрхүү байдлаас улс орны маань хөгжил дэвшил хамаарч таарна. Нэг хэсэг нь уйгагүй хөдөлмөрөө зарцуулан гоё сайхан бүтээн байгуулалт хийгээд, нөгөө хэсэг нь түүнийг нурааж сүйтгээд байвал Монгол орон хэзээ хөгжих юм бэ?

 

Энэхүү байдлаас харахад, ЕБС-ийн сурагчдын хүмүүжил ёсзүйд онцгой анхаарч, эрдэм мэдлэгтэйгээс гадна зөв хүн болгож төлөвшүүлэхэд сургалтын агуулга, бодлогоо чиглүүлэх цаг болжээ. Улс орноо ирээдүйд авч явах иргэд маань боловсролтой, соёлтой, ёс суртахуунтай байвал Монгол хэмээх нэрээ ертөнцийн сонорт дуурсгаж, элэнц өвөг дээдсийнхээ сүнсийг хэмжээлшгүй ихээр баясган баярлуулах биз ээ...

 

Д.Мигаа

Эх сурвалж: ZONE.MN

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...