2017 оны 10 сарын 12
Бүтэн жилийн турш хотын гудамжаар эхнэртээ бөөрний донор хайн алхсан эр

 

“Эхнэртээ бөөр хайж байна” гэх зарын самбарыг биедээ өлгөсөн өтөл насны эр Өмнөд Каролина мужийн Андерсон хотын гудамжаар хөндлөн гулд бүтэн нэг жилийн турш алхжээ. 78 настай Ларри Свиллингийн эхнэр Жимми Сью төрөлхийн нэг бөөртэй төржээ.

 

Гэвч насны эрхээр бөөрнийх нь үйл ажиллагаа доголдож эхэлсэн учраас Ларри болон 3 хүүхэд нь бөөрөө өгөхөөр шинжилгээ өгсөн ч цусны бүлэг нь таарсангүй. Ингээд 57 жил жаргал зовлонгоо хуваалцсан эхнэрээ хүнд өвчинд зүгээр булаалгахыг хүсээгүй Ларри Свиллинг бүтэн жилийн турш эхнэртээ бөөрний донор хайж олохын тулд хот дотроо хөндлөн гулд нь 400 гаруй км-ийг явган алхаж туулжээ.

 

Эхнэртээ дэндүү хайртай, халамжтай Ларри Свиллингийн самбар үүрсэн зураг цахим ертөнцөд цацагдсаныг харсан армийн албан хаагч асан 41 настай Келли Вэвирлинг бөөрөө бэлэглэхээр шийджээ. Тэрээр эмнэлэгт ирж шинжилгээ өгснөөр цусны бүлэг, бусад үзүүлэлтүүд нь ч төгс таарсан байна. Хосуудад бөөрөө бэлэглэхээр шийдсэн Келли Вэвирлинг “Хосуудад итгэл, найдвар өгч, тэдний хайрыг нь шагнахын тулд зөв зүйл хийж байгаагаа цаанаасаа л мэдэрч байсан” гэж CBS телевизэд өгсөн ярилцлагандаа хэлсэн байна.

 

Эхнэртээ хайртай эрийн энэ хүндэтгэм сэтгэлийг харсан 2000 гаруй хүн бөөрөө хандивлах хүсэлтэй байгаагаа илэрхийлсэн бөгөөд тэдний дунд Герман, Швейцарь бүр Ямайкийн иргэд ч байсан гэнэ. Ёстой л жинхэнэ хайр гэж энэ байх даа.

 

 

 

 

 

 

 

 

 

 

 

 

Ж.Сондор

Эх сурвалж : ZONE.MN

 

 

 

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...