2017 оны 10 сарын 12
Путин “Итгэлтэй” найзтай болжээ

 

Туркмений Ерөнхийлөгч Гурбангулы Бердымухамедов Оросын удирдагч Владимир Путинд алабай үүлдрийн гөлөг бэлэглэсэн байна. Бердымухамедов ОХУ-ын Ерөнхийлөгчийн Төрсөн өдөр саяхан тохиосныг дурсан өгүүлсэн аж.

 

“Төрсөн өдрийн мэндийг чин сэтгэлээс хүргэж, танд эрүүл энх, амжилт, бүхий л сайн сайхныг хүсье” хэмээн Туркмений Ерөнхийлөгч уулзалтын эхэнд хэлжээ.

 

Үүний дараахан, уулзалт болж байсан танхимд нэгэн гөлөг авчран, Бердымухамедов түүнийг Путинд гардуулсан байна. Бяцхан нохой “Итгэлт” хэмээх нэрийг хүртсэн аж.

 

Дашрамд сонирхуулахад, 2010 онд Болгарын Ерөнхий сайд Бойко Борисов каракачан үүлдрийн гөлгийг Путинд бэлэглэж байсан билээ. Түүнийг эхлээд эртний Грекийн дайны бурхан тэнгэрийн нэр болох Арес хэмээн нэрлэж байсан бөгөөд дараа нь Путин гөлгөндөө хамгийн шилдэг нэр оноох уралдаан зарлаж, таван настай Дима Соколовын өгсөн Баффи хэмээх нэр шалгарч байсан билээ.

 

Мөн 2012 онд Японы Акита арлын төлөөлөгчид Владимир Путинд акита-ину үүлдрийн гөлөг бэлэглэж байсан. Түүнийг Юмэ буюу оросоор “Мечта” /Мөрөөдөл/ хэмээн нэрлэжээ. Дөрвөн жилийн дараа Оросын төрийн тэргүүн өсч том болсон уг нохойг Японы сэтгүүлчдэд үзүүлж байсан юм. 

 

 

 

Д.Мөрөн

Эх сурвалж: ZONE.MN

АНХААРУУЛГА: Уншигчдын бичсэн сэтгэгдэлд ZONE.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 99941845 утсаар хүлээн авна.
Сэтгэгдлийг ачаалж байна ...